CEBU, Philippines - Usa ka wala mailhing lalaki ang napalgang patay nga may samad pinusilan sa iyang likod, dughan ug tiyan diha sa sitio Kana-as Singson Compound barangay Guadalupe.
Ang patay’ng lawas gihulagway nga nagpangidaron og 40-anyos, semi-opao, adunay gitas-on nga 5’6, adunay tattoo sa iyang duha ka bukton, nagsul-ob kini og berdeng t-shirt ug corduroy nga pantalon.
Sa imbestigasyon sa Homicide Section napalgan sa bukirang bahin sa nahisgutang lugar nga aduna nay samad pinusilan sa nagkadaiyang parti sa lawas.
Nakuha usab sa crime scene ang tulo ka kabhang sa kalibre .45 nga gituohang posibleng maoy gigamit sa pagpusil.
Niana nang pagkabuntag dihang usa ka Eden Besmanos ang nakakaplag sa patay’ng lawas sa biktima diha sa maong dapit. Ang hepe sa Homicide Section Sr. Insp. Jul Mohammad Jamiri mibutyag nga padayon pa ang imbestigasyon sa krimen. (BANAT NEWS)