5-anyos gidunggab sa ama-ama

 CEBU, Philippines - Nalandig sa tambalanan ang usa ka 5-anyos nga batang babaye human kini gidunggab sa iyang ama-ama dihang gikaaway niini ang inahan pasado alas-12 sa tungang gabii sa sitio Alegre, Basak-San Nicolas dakbayan sa Sugbo.

Ang biktima diin nakaangkon kini og samad dinunggaban sa tuong bahin sa iyang kilid samtang ang ama-ama niini nga usa ka newsboy (mga pangalan gipugngan sa Banat News aron maprotehian ang bata) maoy gitumbok nga midunggab sa bata.

Sa imbestigasyon sa kapolisan, ang inahan sa biktima  ug ang suspek nagkatinubagay ug aron malikay sa kasamok migawas ang ginang apan gikatahong gikulata kini sa suspek.

Tungod sa nahiagumang bun-og mibiya ang inahan ug gibilin ang duha ka anak diha sa suspetsado, apan dangtan pila ka minutos mitawag ang suspek sa cellphone sa inahan sa mga bata ug mihulgang pasakitan ang mga anak niini kung di kini mosulod og balik sa balay.

Sunod nga nahitabo mao na ang siyagit sa biktima gikan sa balay maong daling mibalik og sulod ang inahan ug nakit-an niyang nagkadugo na ang 5-anyos nga anak maong dali niya kining gidala sa Saint Anthony Mother and Child Hospital.

Ang hepe sa kapolisan sa Cebu City Police Office, Homicide Section Sr. Insp. Jul Mohammad Jamiri mibutyag sa Banat News nga sa ilang nadawat nga report nga kun mahubog ang suspek ug mangulata sa inahan sa mga bata.  Ang suspek daling miikyas human sa hitabo samtang luwas na sa makuyaw nga kahimtang ang bata.  (BANAT NEWS)