Lima nadakpan sa buybust

CEBU, Philippines - Nabalhog sa sulod sa bilanggoan ang lima ka mga tawo nga gialegar nga nasakmitan og shabu sa buy bust operation nga gihimo sa kapolisan alas- 4 pasado ang takna sa miaging hapon sa sitio Superior sa barangay Looc, dakbayan sa Mandaue.

Ang nadakpan mao sila si Joecar Pezon, 35, Junrel Pezon, 21, Johnuar Manatad, 35, Manuel Gestopa, 41 ug Aian Gestolpa, 35, pulos nagpuyo sa maong dapit.

Si Senior Inspector Wilson Abot, hepe sa kapolisan sa Presinto 3 sa Mandaue City Police Office (MCPO) maoy nangulo sa buy bust operation sa maong lugar.

Matud pa ni SPO2 Danilo Barrita nga nahinabi sa Banat News, walo ka paketeng gidudahang may sulod nga shabu ug drug paraphernalia ang nasakmit gikan sa lima.

Dugang pa niya nga si Joecar maoy unang nadakpan sa buy bust operation ug gisunod usab ang lain pang upat ka mga gikatahapan.

Matud pa ni SPO2 Barrita nga ang laing nadakpan nila ni Senior Inspector Abot mao si Allan Baguio, 23, kinsa gikatahong nag-wild sa miaging gabii sa Highway Tabok sa maong dakbayan.

Sumala pang Abot sa ilang pagrekisa kang Baguio nakuhaan nila kini og mga tin foils ug drug paraphernalia.

Ang lima pasakaan og kasong kalapasan sa Republic Act 9165 kon Comprehensive Dangerous Drug Act of 2002. (BANAT NEWS)