5 ka miyembro sa One Cebu mobalhin sa LP

CEBU, Philippines - Laing sakop sa One Cebu Party ni Gobernador Gwen Garcia gitakdang mobali ug manumpa na isip bag-ong sakop sa Liberal Party (LP) ni gubernatorial beat Hilario “Junjun” Davide III. Gibutyag kini ni kanhi Dumanjug mayor Cesar Barricuatro, kinsa kanhi usab presidente sa Municipal Mayors League sa Sugbo atol sa interview sa Bantay Radyo nga manumpa siya isip sakop sa LP kun mahulma   na ang panag-alyansa tali sa Nationalista Party (NP) ni Sen. Manny Villar   ang partidong iyang gipasakopan.

Matud ni Barricuatro nga niadto pa siyang 2010 Presidential Election mibiya gikan   sa One Cebu human mapupos ang iyang ikatulo ug katapusang termino   sa pagka- mayor ug mipaluyo sa kandidatura   pagka-presidente kaniadto ni Sen. Villar apan napildi siya ni Presidente Aquino. Apan midaug ang iyang anak nga si Cristopher Barricuatro sa pagka -bise mayor sa Dumanjug.

Gibutyag ni Barricuatro   nga nangandam na siya kay mokandidato siya pag-usab sa pagka-mayor    karong umaabot nga election sa 2013 ug atbangan niya si Dumanjug Mayor Nelson Garcia nga igsoon ni Gov. Garcia kinsa mao na usab karon ang presidente sa Mayors’ League sa Sugbo.

Dugang ni BaRricuatro   nga mao pa kini unang eleksyon nga dili na siya mopaluyo sa pamilyang Garcia ilabina ni kongresista Pablo John Garcia nga maoy kandidato pagka Gobernador sa One Cebu.

Matud ni Barricuatro gawas kaniya aduna pay pipila ka mga mayor sa 2nd district nga sakop sa One Cebu ang gipaabot usab nga mobalhin sa LP nga kadungan niyang manumpa pipila ka adlaw gikan karon. Sayo niini gikataho nga adunay upat ngadto sa lima ka mayor sa One Cebu sa segundo distrito ang mobali sa LP human mapublikar ang pag-withdraw og suporta ni Bokal Wilfredo Cameniro sa pamilyang Garcia ug mopaluyo sa kandidatura ni Davide nga sama usab kaniyang Argawanon. (BANAT NEWS)