Tanod patay, polis angol sa pinusilay

CEBU, Philippines - Usa ka barangay tanod nga nahimong wanted criminal kinsa gipangita sa kapolisan sulod sa 3 ka tuig sa katapusan nasakpan apan tungod kay misukol sa mga otoridad napusilan patay siya apan nakapusil angol usab siya og usa ka polis sa miaging gabii didto sa Zone Nangka, barangay Canduman, dakbayan sa Mandaue sa miaging Martes sa gabii.

Ang nakalas mao si Joselito Opo Cortes, 41, minyo, nga taga Canduman ug kanhi barangay tanod sa maong lugar, samtang ang naangol mao si SPO1 Tirso Plania, sa Precinto 6 sa Mandaue City Police Office (MCPO) nga nagbase sa Canduman.

Si PO3 Arnold Villacampo sa kapolisan sa Presinto 6 mibutyag  sa  Banat News nga nag-atubang sa kasong murder si Cortes gumikan sa giingong pagpatay niya sa iyang silingan niadtong tuig 2009.

May arrest order na nga gipagawas ang korte batok kang Cortes apan wala kini ikasilbi kay mitago si Cortes ug wala na igkita sa kapolisan busa nahimo siyang wanted criminal sukad sa maong hitabo

Apan niadtong Martes sa gabii, si Inspector Luis Alama , hepe sa Presinto 6 nakadawat og taho nga si Cortes nasigpatan nga mipauli na sa ilang balay sa Zone Nangka sa barangay Canduman nga   may pipila ka metros ang distansiya gikan sa Presinto 6.

Busa wala maglangan og higayon si Insp. Alama miporma dayon og team sa iyang mga sakop   nga iya mismong gipangulohan.

Miadto sila sa balay ni  Cortes aron isilbi ang warrant of arrest kaniya . Apan sa ilang pag-abot sa balay   ni Cortes gisugat sila ni Virginia, ang asawa    sa nahauna kinsa midumili sa pagpadayon kanila sa sulod sa balay tungod kay wala kuno ang iyang bana. Apan namugos gayud ang kapolisan sa pagsulod   aron masiksik ang mga suok niini ug didto namatikdan nila nga nagtago si Cortes   sulod sa pansayan.

Tungod kay nakaamgo nga nakit-an siya migawas si Cortes ug misirit og dagan pahilayo sa ilang balay agi sa pultahan sa likod sa ilang balay.

Didto magsugod ang ginukdanay nila ni Insp. Alama uban sa iyang mga kauban nga sila si SPO3 Jerson Rosende, PO3 Benjie Abapo, PO2 Jude Cosedo, PO3 Tirso Plania, ug duha ka mga barangay tanod nga kanhi kauban ni Cortes hinungdan nga wala kaayo makapahilayo ang maong wanted nga dakponon.

Apan si PO3 Plania nga didto na daan sa palibot sa maong balay maoy misugat   kang Cortes dihang giluthang siya niini hinungdan nga naigo sa bala sa .45 kalibre nga pistola ang iyang abaga.

Samtang si SPO3 Rosende nasabak usab sa tiyan apan tungod kay may hapin siya nga bullet proof igo lang mihagtik ang bala.

Matud pa ni PO3 Villacampo nga padayong mipabuto si Cortes sa iyang armas    ug ang gihimo nila mao na lang ang pagpahipi nga di masabak sa nagtuasik nga mga bala.

Sa kabalaka nga mangamatay sila, ang kapolisan migamit na sa ilang armas ug giluthang si Cortes ug ang mga samad sa nagkalainlaing bahin sa lawas niini maoy iyang namatyan.

Human mahagba sa yuta si Cortes, dali nga mitawag si Inspector Alama sa mga sakop sa Emergency Rescue Unit Foundation (ERUF) kinsa mikonpirmar   kang Cortes nga patay na.

Pag-abot sa mga sakop sa SOCO sa maong dapit, nakuha nila sa patay’ng lawas   ni Cortes ang usa ka .38 kalibre nga revolver ug .45 kalibre nga pistola nga may pito pa ka buhing bala.  (BANAT NEWS)