100% ang pagsaka sa kaso sa dengue

CEBU, Philippines - Moabot ngadto sa kapin sa 100% ang pagsaka sa kaso sa dengue dinhi sa dakbayan sa Sugbo itandi sa miaging tuig.

Sa talaan sa City Epidemiology Statistics and Surveillance Unit (CESSU) sa City Health Department, 1,677 ka kaso na ang natala sukad niadtong Enero hangtod sa unang bahin sa Hulyo niining tuiga ug pito na ang namatay.

Sumala pa sa talaan sa city health department sa siyudad mas taas kini itandi sa mga kaso sa susamang mga bulan sa miaging tuig nga 765 ka kaso samtang walo ang patay.

Giingong ang padayon nga pagsige og uwan maoy usa sa mga hinungdan nga nagpabilin gihapon ang mga lamok nga maoy nagdala sa maong sakit.

Pipila sa mga barangay nga gi-monitor nga gidagsaan sa dengue naglangkob sa   Kalubihan, Cogon Ramos, Sto. Niño, Bacayan,    Sambag 1, Sta. Cruz, San Nicolas, Zapatera, Pit-os, San Antonio, Kamagayan, Pasil, Kamputhaw, Pahina Central, Ermita, Tinago,Sapangdaku, Inayawan, Suba, Guadalupe, Capitol Site, T.Padilla, Mabolo, Cogon-Pardo ug uban pa.

Si Mayor Michael Rama miawhag sa publiko nga manglimpiyo kanunay sa ilang palibot aron malikayan ang pagdagsa sa mga lamok nga maoy nagdala sa maong sakit.

Ang City Health Department mihimo karon og mga pulong-pulong sa nagkadaiyang barangay alang sa kampanya batok sa dengue.

Usa sa ilang giduso mao ang kanunay ang pagyabo sa mga napundong tubig sa mga flower vase, ligid, mga hugasan ug uban pang mga butang nga posibleng mahimong kaitlogan sa lamok diha sa kabalayan. (BANAT NEWS)