CEBU, Philippines - Mahimong i-ban sa mga lokal nga kagamhanan ang full-face helmets o kadtong dili makita ang dagway sa mag-motorsiklo sumala pa sa Land Transportation Office 7.
Gipadayag kini ni LTO 7 Regional Director Raul Aguilos atol sa iyang pagtambong sa sesyon sa hunta probinsiyal sa Sugbo kagahapon.
Matud pa ni Aguilos nga tulo ka klase sa helmet ang mahimong magamit sa mga mag-motorsiklo sama sa full-face, half-face ug half-head apan kinahanglan nga mopasar kini sa Bureau of Product Standard sa Department of Trade and Industry.
Ang kapolisan unang mipadayag og kabalaka nga gamiton sa mga kriminal ang pagpatuman na sa hingpit sa Helmet Act diin kadto lang mga aprobado sa DTI ang ipagamit nga kasagaran mao ang full-face helmet. “They can recommend for the banning of full-face for security reasons,” matud pa ni Aguilos.
Wala hinuon natubag ang pangutana sa ubang sakop sa hunta probinsyal sanglit wala motambong si Asteria Caberte, ang regional director sa DTI-7 kagahapon.
“Di mandatory ang full face, for as long as naay standard protective helmet for motorcycles,” dugang pa ni Aguilos. (BANAT NEWS)