CEBU, Philippines - Tulo ka tawo ang gipamatay sa managlahing insidente sa pagpamusil ug pagpanunggab sa dakbayan sa Sugbu sa miaging gabii.
Pasado alas-7 sa miaging gabii, usa ka lalaking naila lang sa pangalang “Alexes” nga mamaligyaay og cellphone diha sa dalan Leon Kilat ang gidunggab patay sa wala mailhing lalaki.
Sa pasiunang imbestigasyon sa kapolisan nasayran nga ang biktima namaligya og second hand cellphone diha sa nahisgutang lugar dihang kalit giduol sa mamumuno ug giduslak og kutsilyo sa walang bahin sa dughan. Daling miikyas ang mamumuno ug gibiyan ang 14-pulgadas nga kutsilyong gigamit niini sa pagpatay sa biktima. Gidudahang atraso o ba kaha pagpangilad sa iyang mga kustomer ang motibo sa krimen.
Nasuta nga ang mga manindahay diha og mga 2nd-hand nga cellphone anha lang moladlad sa ngitngit nga bahin sa eskina Leon Kilat ug Sanciangko nga tapuk-an sa mga tawo, gituohang ang uban niini kinawat.
Sa Pasil
Sa samang takna, usa ka mananagat ang nadunggaban sa silingan apan ang nanunggab gipusil patay usab sa duha pa ka laing silingan diha sa sitio Lawis, barangay Pasil.
Ang nadunggaban ug nalandig sa tambalanan mao si Aldrin Suan, 28, nga giingong gikalalis ug gidunggab ni Rogelio Gabasa Jr., 26. Si Gabasa padulong na untang moikyas dihang kalit kining gipusil sa nawong nila ni Macsas Santillas ug Detoy Dacay pag-abot sa dalan Magsaysay sa maong barangay. Sa pakisusi sa kapolisan sa crime scene, si Suan adunay samad pinusilan sa ilong nga milapos sa luyong bahin sa ulo nga nakaingon sa iyang hinanaling kamatayon, nakuhaan usab og 8-pulgadas nga kutsilyo si Suan. Si SPO4 Alex Dacua ang imbestigador sa Homicide Section mibutyag nga managhigala ang upat ug nagkabingkil tungod sa halin sa pisi nga ilang gibaligya.
Sa T.Padilla
Samtang duha ka oras una pa ang maong mga krimen, gipamusil ang managhigalang sila si Alberto Yape alyas Oding, 40, ug Quirico Mangyao Jr., 39, pulos residente sa sitio Lower Lomar barangay T. Padilla.
Ang duha gikatahong nagbarogbarog lang sa maong lugar dihang kalit nga miabot ang duha ka wala mailhing lalaking luwan og motorsiklo ug mipaulan kanila og bala. Si Yape nga may samad pinusilan sa dapidapi ug patay na pag-abot sa Cebu City Medical Center samtang si Mangyao nga naigo gihapon sa dapidapi pabiling gitambalan sa maong tambalanan. Gisusi pa sa kapolisan kung unsay motibo sa maong krimen ug gitino pa kung unsay background sa mga biktima. (/EIM) (BANAT NEWS)