NFA mitanyag bugas pautang sa LGU

CEBU, Philippines - Ang National Food Authority (NFA-7) miawhag sa Local Government Units (LGU) sa pagpahimus sa   non-credit rice program nga ilang gitanyag aron kapangandaman sa lokal nga kagamhanan ang mga emerhensyang panghitabo sama sa mga kalamidad nga makatandog sa pagpuyo ug panginabuhi sa katawhan.

Gibutyag ni Provincial Manager Nestor Rey Alcoseba NFA-7 nga ang buhaton sa   mga LGU sa Sugbo mao ang   pagpirma og Memorandum of Agreement (MOA) tali sa NFA-7 aron makautang sila og sinakong bugas sa maong ahensya.

Kini may labot sa Rice Loan Program sa NFA nga gitumong aron matabangan ang LGU nga may magamit sila alang sa dinaliang relief operation sa panahon nga adunay tabanganan og pagkaon sa ilang tagsatagsa ka hurisdiksyon kinsa mahiagom sa unsa mang katalagman.

Magsilbi usab kining buffer stocking o pamundo isip pangandam sa panahon sa emerhensya nga kalit lamang motunga sa mga oras ug   panahon nga dili paabuton.

Matud pa ni Alcoseba nga aron makapahimus ang mga lokal nga kagamhanan sa   maong programa, ang Sangguniang Bayan kinahanglang molig-on og resolusyon pagtugot sa ilang mayor nga mopirma og MOA tali sa NFA ug usab paggahin og igong kantidad gikan sa ilang calamity fund alang sa maong proyekto.

Midugang si Alcoseba nga ang LGU mahimong mo-withdraw sa giaprobahang gidaghanon sa stock sa bugas sa sulod sa 15 ka adlawng tingtrabaho gikan sa NFA provincial office kinsa migahin og 1,000 ka sakong bugas matag tuig sa matag lungsod.

Sa miagi, adunay 20 ka LGU nga mipirma og MOA tali sa NFA-7 apan subo lamang nga pamalandungon kay wala na mo-renew ang uban human   sa one-year term contract. (BANAT NEWS)