SOPA ni Garcia gisaway sa Akbayan

CEBU, Philippines - Gisaway sa Akbayan-Cebu ang State of the Province Address (SOPA) ni Governor Gwendolyn Garcia gumikan kay matud pa kuwang kini sa unod.

Ang tigpamaba sa Akbayan-Cebu nga si Mikay Dumabok miingon nga napuno sa kolor politika ang maong SOPA ilabi na nga nangayo si Garcia og suporta sa katawhan sa iyang kandidatora pagka-senador karong 2013 nga bugnong lugaynon.

Kahinumdoman nga napuno sa mga politiko ilabi   na sa mga sakop sa United National Alliance (UNA) ang SOPA ni Garcia nga naglangkob nila ni Milagros Magsaysay, Miguel Zubiri, ug Jose de Venecia III.

Gitambongan usab kini nila ni Bise Presidente Jejomar Binay, Senate President Juan Ponce Enrile ug kanhi presidente Joseph Estrada.

Nagkanayon si Dumaboc nga kinahanglan unta nga mopunting si Garcia sa pagtuki sa iyang mga nabuhat aron masayud ang katawhan sa mga nahimo niya sa probinsya.

Nasayran nga mokabat sa 8,500 ang nanambong sa maong kalihukan nga gilangkoban sa barangay health worker, tanod, opisyales sa barangay, pribadong sektor ug mga local official ubos sa One Cebu Party. 

Samtang malipayon ang Akbayan gumikan kay napasaka na sa Sandiganbayan ang mga kaso ni Garcia aron nga matubag niya kini didto  sa korte.

Nagkanayon si Dumabok nga hagbay ra nagpaabot ang publiko sa maong sitwasyon apan dugay kaayo kining nasang-at sa hukmanan. (/WC)(BANAT NEWS)