Rapist nga milugos og dalagitang estudyante sikop

CEBU, Philippines - Gisikop sa kapolisan sa miaging gabii ang usa ka estudyante sa high school kinsa nalutsan og warrant of arrest sa kasong pagpanglugos duha na ka tuig kapin ang milabay didto sa lungsod sa Malabuyoc.

Ang 20 anyos nga ulitawo didto hidakpi sa sitio Kanipaan, barangay Poblacion 1, sa   maong lungsod.

Ang warrant of arrest alang kaniya giluwatan ni RTC-Branch 26 Judge James Stewart Himalaloan.

Si PO2 Belladona Ybanez, Women’s and Children Protection Desk Officer sa Malabuyoc Police Station mibutyag nga daan nang nasayod ang kapolisan nga adunay standing warrant ang suspetsado kansang ngalan giila lang nga Boy (di tinuod niyang ngalan).

Matud pa ni Ybañez nga wala ikasilbi sa kapolisan ang maong arrest order tungod kay wala nila hikit-i ang maong suspetsado.

Maayo nalang kay may nahitabong panag-away didto sa sitio Kanipaan sa miaging gabii nga gisusi sa kapolisan.

Apan nataymingan nga ang ilang gipangita  nga suspetsado didto sa maong higayon kay maoy miuwang sa duha ka tawo nga buot maglinayogay.

Busa wala mag-usik og higayon ang kapolisan gisikop dayon nila kini ug gipasabot nga may warrant of arrest nga alang kaniya.

Gisaysay  ni Ybanez nga nahitabo ang pagpanglugos duha na ka tuig ang milabay dihang ang suspetsado ug ang biktima mitambong og kalingawan sa ilang lugar

Matud pa ni Ybanez nga sa maong higayon gipugos sa suspek   pagguyod ang biktima ngadto sa mingaw ug hilit nga lugar diin didto kini niya pahimusli.

Human sa hitabo nakabaton og nerbyus ang dalagita ug miundang kini makadiyot sa pagtungha ug maayo nalang kay nakombinse sa inahan human kini motug-an nga giamong-amongan siya sa suspek.

Diha-diha gikiha dayon sa mga ginikanan sa biktima ang suspetsado hinungdan nga naluwatan kini og warrant of arrest.

Gitanggong na karon sa Malabuyoc Police Station ang suspetsado. (BANAT NEWS)