Foreman nasikop sa buy-bust

CEBU, Philippines - Nasikop sa kapolisan ang usa ka suspetsadong pusher og shabu sa gipahigayong buy-bust operation niini didto sa sitio DAS, barangay Lutopan, dakbayan sa Toledo sa miaging gabii.

Ang suspetsado nga naposasan sa Philippine Drug Enforcement Agency (PDEA)- mao si Erlie Eric Cantalajo, 42, residente sa maong dapit kinsa   nasakmitan og duha ka paketeng shabu.

Si Jessie Tabanao, tigpamaba sa PDEA sa pakighinabi sa Banat News kagahapon mibutyag nga ang suspetsado, usa ka foreman sa Carmen Copper Mining sa Lotupan.

Matud niya nga sa milabay’ng upat ka buwan nakadawat sila og report bahin sa ilegal nga kalihukan ni Cantalajo, busa ila kining gipanid-an sulod   sa tulo ka semana.

Human nila masuta nga positibo ang maong negosyo sa suspetsado mihimo dayon sila og buy-bust operation pinaagi sa paggamit og polis nga nagpaka-aron ingnon   nga buyer og shabu.

Human dawata niini ang marked money, gitunol usab dayon niya ang duha ka paketeng shabu ngadto sa poseur buyer busa naposasan dayon siya.

Matud pa ni Tabanao nga ang ubang mga kostumer ni Cantalajo mga trabahante ra usab sa Carmen Copper.

Sa pagkakaron nagtingkagol na sa prisohan ang   suspek. (BANAT NEWS)