CCPO alerto sa SONA

CEBU, Philippines - Alerto karong adlawa ang kapolisan dili lang didto sa kaulohan nunot niining paghatud husay o State of the Nation Address ni Presidente Benigno ‘Noynoy’ Aquino III karung hapon.

Ang Cebu City Police Office kansang hurisdiksyon maoy sagad pahigayonan og mga lihok protesta sa mga militante nga pundok ning mga samang okasyon mopakatap og kapolisan aron masiguro ang kahapsay ug kalinaw sa pagpahigayon og mga rallies.

Ang hepe sa Cebu City Police Office, City Intelligence Branch, Chief Insp. Romeo Santander mibutyag sa Banat News nga panid-an usab nila dili lang ang mga raliyista kay posibleng mosiaw ang ubang mga krimen.

Ang CCPO ibutang sa heightened alert karong adlawa aron dunay igong pwersa ang kapolisan nga mapadala kung dunay kagubot nga mahitabo sa rally ilabi na diha sa dalan Colon, Fuente Osmeña Rotunda ug sa Plaza Independencia.

Didto sa kaulohan ang kapolisan mopakatap og 7,000 ka mga polis diha sa Batasang Pambansa diin ihatud ni Aquino ang iyang SONA.

Ang tigpamaba sa Malacañang nga si Edwin Lacierda sa report sa GMA News Online nagkanayon nga dunay kamandoan si Aquino sa tanang mga opisyales nga dili mopagawas og impormasyon bahin sa iyang SONA karong adlawa.

Apan gipasalig ni Lacierda nga kini “truthful and inspiring” ug kini mopokus sa pagpahibalo unsay nahimo niya sa iyang tulo ka tuig nga pamunoan ug kung unsay plano sa mosunod nga tuig. (BANAT NEWS)