Gov. Garcia ug Balili issue hayan iapil sa SONA ni P.Noy

CEBU, Philippines - Hayan malakbitan sa State of the Nation Address ni Presidente Benigno Aquino III karong hapon ang mga kasong gipasaka batok sa managhigala nga sila si kanhi Presidente Gloria Macapagal Arroyo ug Gob. Gwendolyn Garcia.

Kini ang pagtoo ni Capitol spokesperson Rory Jon Sepulveda human gidungan pag-raffle sa Sandiganbayan ang kaso sa duha ka mga opisyal niadtong Biyernes.

“They are trying to come up with a bigger picture for the State of the Nation Address,” sumala pa ni Sepulveda.

Daghang mga tabi-tabi kung nganong si Arroyo lang ang napasakaan og mga kaso ubos karon sa administrasyon ni Aquino. Si Arroyo gipasakaan og kasong plunder usa ka semana sa wala pa gipasaka ang kasong pagpangawkaw batok kang Garcia niadtong Huwebes apan gidungan kini sa pag-raffle niadtong Biyernes. Si Arroyo suod nga higala ni Garcia kinsa mopapili sa pagka-senador sa 2013 ubos sa United Nationalist Alliance nga kaatbang ni Aquino.

“Kani sila, they think that their cutesy style will hamper sa zest sa atong gobernadora, sayop sila,” matud pang Sepulveda.

Gipadayag ni Sepulveda nga sa sinugdanan pa sa kontrobersiya sa pagpalit sa luna sa mga Balili, masaligon sila nga han-ay ang transaksiyon.

“We are hoping nga sa ilang rush wa kaayo ni mamaayo pagkaluto,” sumala pa ni Sepulveda. Gikalipay hinuon sa kampo ni Garcia nga naabot sa korte ang kaso aron mahatagan siya og higayon nga makapanalipod sa isyu batok kaniya.

Gihulagway ni Sepulveda nga sama sa bao ang mga Garcia nga gitambog sa suba niining ilang giatubang karon nga legal nga proseso.

Gitun-an na pag-ayo sa mga abogado ni Garcia ang sunod nila nga lakang karon nga ang tulo ka kasong kriminal anaa na sa Sandiganbayan.

Pipila ka adlaw human gipahibawo ni Kong. Tomas Osmeña nga suspensuhonon na si Garcia gipasaka dayon sa Ombudsman ang mga kaso ngadto sa Sandiganbayan.

“Kinsa pa may mosalig sa Ombudsman maayo pa ila gihilom,” dugang pa ni Sepulveda. (BANAT NEWS)