Publiko magbantay sa hilanat

CEBU, Philippines - Higpit nga gipasidan-an sa mga tinugyanan sa panglawas ang mga molupyo sa Central Visayas nga magmabinantayon kanunay    ug ikonsulta dayon sa mga doktor   kun duawon sa hilanat ilabi na ang gagmay nga mga bata.

Ang maong pasidaan gisubli-subli na sa pagpalanog ni Regional Director Asuncion Anden sa Department of Health (DOH)7 tungod kay duha na ka bug-at nga sakit ang   nasuta nga magsukad sa bug-at nga hilanat sama sa dengue ug ang gikan sa gawas nga Enterovirus 71(EV71).

Matud pa ni Anden nga bisan kun mabinantayon kaayo ang atong mga tinugyanan sa Bureau of Quarantine ug sa tanang mga dagkong tambalanan sama sa Vicente Sotto Memorial Medical Center(VSMMC) dinhi sa Sugbo, apan dili gyud angay nga magkompiyansa ang publiko.

Miingon siya nga bisan kun dili angay kabalak-an ang EV71 kay bisan tuod mipatay kini og 60 kapin ka mga bata sa Cambodia apan dinhi sa nasud nakapangandam na   ang   DOH niini.

Apan matud pa niya anaa na sa publiko ang pagpakabana ug ang usa sa angayang buhaton mao ang pagdangop gilayon ngadto sa health center ug labaw sa tanan sa mga doktor   kun hilantan    aron hisayran kun unsay mahimong linugdangan sa maong hilanat ngadto sa lawas sa   nagdala niini.

Nasuta nga ang usa ka tuig kapin nga bata nga taga Mindanao napositibo sa EV71 apan giingon nga gaan-gaan ang igo niini ngadto sa maong bata lahi sa nahiagoman sa 61 ka bata sa Cambodia nga wala gayud masalbar.

Sayo niini si Gerardo M. Aquino, chief of hospital sa VSMMC mipasalig nga nagbaton na sila karon og mga modernong kahimanan aron magamit dayon sa pag-ila sa matang sa balatian nga motakboy sa panglawas sa publiko. Matud pa niya nga mabinantayon kaayo sila karon ilabi na niining nabaniog nga EV71. (BANAT NEWS)