CEBU, Philippines - Naangol ang usa ka kawani sa goberno sa lungsod sa Argao human kini masaghiri og sakyanan samtang nagsakay sa iyang motorsiklo didto sa sitio Suba, barangay Poblacion, lungsod sa Argao sa miaging Biyernes sa gabii. Ang biktima nailhan nga si Gemar Pamat, hingkod, ulitawo nga nagpuyo sa barangay Tulic, sa maong lungsod ug nagtrabaho sa munisipyo sa Argao.
Samtang ang drayber sa Toyota pick–up nga maoy misaghid kaniya may plate No. nga SHC-931 mao si Emmanuel Allanic, 37, minyo, nga taga dakbayan sa Sugbo.
Si PO2 Benjamen Gerozaga sa Argao Police Station mibutyag sa Banat News nga ang Toyota pick up gikan pa sa barangay Looc paingon ngadto sa Sibonga nga direction , samtang ang biktima nga gisundan sa pick-up mihunong sa maong lugar ug miparking makadiyot sa iyang motorsiklo apan wala pa siya mokanaog niini. Apan wala siya mabantayi sa drayber sa pick-up kinsa midumog og deretso niini hinungdan nga nalimbuwad siya gikan sa iyang motor.
Gihatud dayon sa tambalanan sa dakbayan sa Sugbo ang biktima samtang ang drayber sa pick-up nga midasmag kaniya mitahan usab dayon sa iyang kaugalingon ngadto sa kapolisan ug sa pagkakaron nagtingkagol na sa prisohan sa lungsod samtang nagpaabot sa kiha nga isang-at batok kaniya sa tagtungod sa biktima. (BANAT NEWS)