CEBU, Philippines - Sa katapusan nahawan na ang Block 27 sa reclamation area sa barangay Mabolo, ning dakbayan sa Sugbo human mamiya ang kapin 20 ka pamilya kinsa temporaryong gipapuyo sa maong lugar kapin sa usa ka tuig.
Matud pa ni Antonio Hermosisima, hepe sa Prevention Restoration Order Beautification Enhancement (Probe) nga ang maong mga molupyo kinsa gipapahawa ni Mayor Michael Rama gikan sa sapa sa Mahiga misugot na nga adto sila mamuyo sa luna nga gibaligya sa kagamhanan kanila sa barangay Budlaan.
Ang maong mga molupyo nga nanimuyo sa lote sa goberno sa norte nga bahin sa dakbayan sa Sugbo, gipaestalaran og tubig ni Kong, Tomas Osmeña sa habagatang distrito sa dakbayan sa Sugbo.
Gani nakurat si Rama sa maong lakang ni Osmeña kay gibiyaan niya ang iyang mga atimanonong mga molupyo sa south nga maoy iyang hurisdiksyon ug didto siya moyampungad sa pagtabang sa taga norte nga dili niya hurisdiksiyon.
Ang maong mga molupyo nga wala mawili sa tubig ni Osmeña misugot sa awhag ni Rama tungod kay nasayud sila nga dili sila angay mopahimus sa yuta nga wa ihatag kanila sa goberno.
Gani ang ubang mga eskuwater nga wala matarug sa giukopar nilang mga yuta sa goberno nagkatawa tungod kay ang mga opisyal na sa kagamhanan maoy mahadlok mopapahawa kanila gumikan sa ilang boto panahon sa election. Apan sa bahin ni Rama gipaila niya ang iyang political will sa pag-edukar sa mga molupyo nga dili sila angay mosupak sa mando sa kagamhanan.
Matud pa ni Rama nga mahimong masuko kaniya ang dyutay apan gusto niya ang mayoridad sa mga molupyo nga maoy tag-iya sa kabtangan ning siyudad dili masuko kaniya.
Sa sayo pa nagdumili ang maong mga molupyo pagbalhin ngadto sa Budlaan tungod sa kalayo niini sa ilang panginabuhi.
Apan dihang nasabtan nila nga kun mosupak sila papaulion sila ngadto sa kalungsoran diin sila naggikan kay wa man silay kaugalingong yuta dinhi sa siyudad, napuypoy ang ilang hunahuna ug mibiya silang malinawon sa Block 27.
Ang mga sakyanan sa Cebu City Hall, maoy gikargahan sa ilang mga butang paingon ngadto sa Budlaan.
Mipagamit usab ang siyudad og mga tulda, koneksyon sa kuryente ug tubig didto sa luna nga ilang balhinan samtang wala pa sila kapatukod og balay. (BANAT NEWS)