Nanulis nadakpan sa checkpoint

CEBU, Philippines - Tulo sa upat ka mga suspetsadong armadong tulisan nga gikan   pang nanulis sa siyudad sa Danao ang nadakpan sa checkpoint sa kapulisan diha sa barangay Casili habig sa lungsod sa Consolacion niadtong Biyernes sa alas 8:45 sa gabii.

Ang mga nadakpan mao sila si Roger Doncillo ug igsuong si Ryan Doncillo pulos taga Talamban, siyudad sa Sugbo; ug Jose Batican, taga Cogon, siyudad sa Danao samtang nakapasutoy sa motorsiklo ang kaubang si Jomar.

Matud ni PO2 Johnaskie Romero sa Consolacion Police dihang nahinabi sa Banat News ang upat nagsakay sa duha ka motorsiklo nga nag-angkasay gikan sa siyudad sa Danao ug paingon sa direksyon sa siyudad sa Sugbu.

Apan pag-abot nila sa maong lugar nakamatikod kini nga dunay checkpoint sa unahan hinungdan nga mihunong sila ug miliko sa pikas dalan apan didto naapsan sila nila ni PO2 Diosibio Batulan ug mga kaubanan.

Si Roger Doncillo gikatahong misuway pa unta og sukol ug mibunot sa iyang kalibre .45 nga pistola apan naunhan og tion sa mga polis hinungdan nga silang tulo mitahan apan nakaipsot ang gipanganlan og Jomar diha sa kalibunan.

Nakuha gikan ni Roger Doncillo ang kalibre .45 nga dunay upat ka bala ug kalibre .357 revolver nga dunay duha ka buhing bala ang nakuha ni Batican.

Sumala pa ni PO1 Harley Ytang sa Consolacion Police Station ang tulo positibong giila sa biktima sa pagpanulis sa sitio Cogon Crossing Ylaya sa dakbayan sa Danao nga si Apple Jean Juntillas, 20, nga usa ka OFW nga nagpuyo sa maong dapit ug nakuha gikan kaniya sa tulo ka tulisan ang P9,000, cellphone ug mga alahas. (BANAT NEWS)