CEBU, Philippines - Gihimakak sa kadagkoan sa Barug Alang sa Kauswagan ug Demokrasya (Bakud) Party sa banay’ng Durano sa ikalimang distrito sa lalawigan sa Sugbo ang pasangil nga may kalabutan sila sa pagpasaka og kasong kriminal batok kang Gob. Gwendolyn Garcia mahitungod sa giingong anomalosong pagpalit sa luna sa mga Balili.
Ang pamahayag giluwatan sa Bakud Party isip tubag sa pasangil ni San Juan City Kong. Joseph Victor Ejercito nga posibleng ang gihimong kondisyon sa mga Durano ang pagkiha sa gobernador sa ilang pagpakig-alayon sa Liberal Party.
Matud pa sa Bakud nga wala sila mobungat og kundisyon sa LP sama sa pagpasaka og kaso batok kang Garcia sanglit ang kaso nagsugod niadto pang tuig 2009, taas nga panahon sa wala pa ang panag-alyansa sa duha ka partido.
Ang Bakud ug LP niduso sa kandidatura nilang kanhi konsehal Hilario Davide III pagka-gobernador ug Bise-Gob. Agnes Magpale human sila nibuwag sa One Cebu Party sa mga Garcia.
“The statement of JV Ejercito is very reckless and irresponsible when they don’t even have the facts yet. It only goes to show that the national politicians lack of knowledge pertaining the local politics and politics in the district. JV Ejercito should have checked the facts first before making an insinuation about our party,” matud pa ni Bakud Party Chairman, Kong. Ramon “Red” Durano VI.
Nunot niini, nakahukom ang banay’ng Durano sa dili pagsuporta kang Estrada kinsa mopapili usab sa pagka-senador kauban ni Garcia ubos sa United Nationalist Alliance.
“I categorically deny that we have a hand in this filing. I agree with the statement of Cong. Red Durano nga ang mga politiko sa national wala’y kalibutan sa atong mga issues diri,” matud pa usab ni Magpale. (BANAT NEWS)