Teddy O.milayat sa LP

CEBU, Philippines - Pormal nga gipahibalo ni Liberal Party Gubernatorial candidate Hilario "Junjun" Davide III nga si Provincial Board Member Thadeo "Teddy" Ouano mihurar na sa ilang partido.

Kini nahitabo atol sa ika-46 nga adlaw’ng natawhan ni Mandaue City Mayor Jonas Cortes. Sumala pa ni Davide ang desisyon nakab-ot human sa panagtapok sa council of elders ug mga dagkong political clan sa dakbayan sa Mandaue.               

Samtang si Teddy Ouano sa iyang bahin mipasabot ngadto sa mga sakop sa media nga ang iyang paglayat sa LP maoy nauyonan sa iyang pamilya pinangulohan sa iyang amahang si kanhi mayor Alfredo "Pedong" Ouano ug anak niini nga si Lolipop Ouano Dizon nga pulos sakop sa LP.

Matud pa ni Ouano wala pa mahibalo niini si Governor Gwendolyn Garcia apan daan na kining nasayod nga ang pamilyang Ouano didto na misuporta sa LP hinungdan nga wala na siya makabalibad ngadto ni Davide.

Atol sa birthday ni Mayor Cortes mitambong usab sila si Kong. Tomas Osmeña, Kong. Luigi Quisumbing, Pedong Ouano, kanhi Kong. Nerisa Soon- Ruiz, Atty. Carlo Fortuna, kanhi bise mayor Pat Cañete ug uban pang mga political leaders sa dakbayan sa Mandaue.  (BANAT NEWS)