CEBU, Philippines - Ipakatap sa kapolisan sa dakbayan sa Lapulapu ang mga dagway sa mga most wanted criminal sa maong dakbayan sa mga pampublikong lugar niini.
Kini ang gipadayag ni Lapulapu City Police Office OIC Director P/SSupt. Rey Lyndon Lawas atol sa inugurasyon sa ilang bag-ong edipisyo ug opisina sa kapolisan sa miaging buntag. Aron sa pagpadasig sa kapolisan ,si Mayor Paz Radaza mipasalig nga mohatag siya og P50 mil ni bisan kinsa nga makatudlo ug makahatag og impormasyon bahin ni Demetrio Malingin ang suspetsadong mirakrak sa balay sa pamilyang Aying sa Brgy. Mactan dakbayan sa Lapulapu sa milabay’ng bulan ug mipatay sa inahan sa maong pamilya nga si Emma Aying.
Matud ni Radaza nga bugti sa dul-an P10 milyones nga gahin sa siyudad sa pagtukod sa bag-ong edipisyo sa kapolisan sa Lapulapu mao ang paghatag og kasulbaran sa kaso sa illegal nga drugas sa maong dakbayan ug pagpuhag sa mga tawo nga nagpaluyo niini bisan pa kung kini kaalyado sa mayor.
Samtang si SSupt. Lawas miingon nga gawas ni Malingin, ang hulagway sa tanang most wanted person sa dakbayan sa Lapulapu ila nang gipadak-an aron maklaro kaayo kini sa katawhan ug mailhan usab sa dayon. Si CSupt. Garbo mipadayag usab og pagsalig sa katakos ni SSupt. Lawas hinungdan nga mao kini ang iyang gitudlo nga OIC Director sa kapolisan sa maong dakbayan gawas sa iyang pagka- Director sa PNP7 RIID. (BANAT NEWS)