Gipusil sa polis tuhod gilapsan sa bala

CEBU, Philippines - Nalapsan sa bala ang tuhod sa usa ka lalaki dihang nakigpinusilay kini sa kapolisan nga mipahigayon og buybust operation sa usa ka balay sa suspetsadong illegal drug pusher sa dalan Lakandula, sitio Suba, barangay Poblacion, lungsod sa Argao sa miaging gabii.

Ang   biktima mao si Thadeos Montana Saniel alyas Taddy, hingkod, nga molupyo sa nahisgutang lugar.

Sa pakighinabi sa Banat News ni Chief Inspector Alejandro Batobalonos, nasayran nga nagpahigayon sila og buy bust operation sa balay ni Jomar Puerto alyas Tigulang nga usa ka suspetsadong drug pusher sa sitio Looc sa nahisgutang barangay. Sa ilang operasyon, malampuson nilang naposasan si Puerto human itunol niini ngadto sa poseur buyer nga polis ang shabu nga gibayran og marked money  sa kapolisan.

Apan kalit mihiwasa ug milugnot si Puerto dayong dagan niini ug nagpakitabang sa mga silingan uban sa pahibawong mga polis ang namalit sa iyang shabu.

Matud pa ni Batobalonos nga mao nalay ilang nasigpatan ang kalit nga pag-abot ni Saniel nga nagtaptap og itom nga panyo sa iyang nawong nga may dalang armas de fuego

Dayon namusil kini ngadto sa kapolisan ug kun wala pa makapasalipod sa traysikol usa sa mga polis nga PO2 Mervin Chen maigo unta. Gumikan kay nalipat ang mga polis, sayon usab kaayong nakasibat si Puerto nga nagtangag og posas ang kamot

Si Batobalonos kinsa nabalaka nga silay mamatay kun dili nila masanta si Saniel, giluthang niya ang tuhod sa biktima busa nalapsan kini sa bala. Pagkalup-og ni Saniel sa yuta puniton na unta     ni Batobalonos ang 357 magnum revolver niini apan kalit nga gikablit sa biktma ang gatilyo sa maong armas ug maayo nalang kay nahutdan na og bala kay kun may bala pa siguradong mapusilan si Batobalonos.

Ila dayon kining gihatud ngadto sa Isidro Kintanar Hospital apan samtang nagpaatubang na sila ngadto sa tambalanan milanit na usab si Saniel sa iyang giluklok nga granada apan nailog dayon sa kapolisan

Samtang si Puerto kinsa notado usab nga level 2 nga mamaligyaay og gidiling drugas sa maong lugar padayon nang gipangita karon sa kapolisan.

Kasong attempted murder ug kalapasan sa Republic Act 9516 kon illegal possession of explosives maoy atubangon ni Saniel samtang si Puerto usab kasong pagpamaligya sa ginadiling drugas maoy iyang atubangon karon. (BANAT NEWS)