CEBU, Philippines - Kinse ka mga tinun-an sa high school nga pulos mga babaye ang giingong nasudlan og dautang espiritu ug nagdungan nga nangawad-an og panimuot samtang ang uban kanila gikatahong nag- wild tungatunga sa ilang klase diha sa Buanoy National High School sa barangay Buanoy sa lungsod sa Balamban kagahapon sa mga alas 10:00 pasado sa buntag. Usa ka 15-anyos nga 3rd year student nga taga Laray-3, Buanoy ang unang naluya ug nakuyapan sulod sa klase dayon nang alas 11:00 sa buntag human kini gika-report nga nasudlan og dautang espiritu.
Apan pagkahuman niini nagsunod dayon ug nakuyapan ug nangaluya samtang nag-wild usab ang ubang tinun-an sa 2nd year ug 4th year nga nakamugna og kagubot sa tibuok eskuylahan.
Tungod kay nangalisang naman ang mga tinun-an napugos ang prinsipal nga si Esmael Borgonia sa pagdeklarar nga kanselahon ang klase.
Matud ni PO1 Alfredo de Gracia sa Balamban Police dihang nahinabi sa Banat News kinsa usa sa miresponde sa alarma nga usa lang ka tinun-an nga na-grabehan nga mao kadtong unang giingong nakuyapan ug naluya og maayo.
Apan dunay usa usab nga gidala nila sa tambalanan tungod kay giingong maoy ‘wild’ kaayo gikan sa alas-11 sa buntag ug alas-2 na sa hapon kini napakalma.
Dugang pa ni de Gracia nga tungod sa kahimtang sa maong bata gikarga nila sa patrolcar aron unta dad-on kini ngadto sa Balamban District Hospital apan giingong gipugngan sila sa inahan sa bata ug nagpahatud na lang sila pauli sa ilaha. Matud ni PO1 de Gracia nga samtang sila nagpaingon sa tambalanan sakay sa patrolcar kauban ang inahan sa bata miingon nga sayo kagahapon sa buntag ang iyang anak ug ang ubang mga bata nanglabay og bato sa usa ka punoan sa santol diha sa maong tunghaan.
Nagduda ang inahan nga nakaigo ang mga bata og ‘dili ingon nato’ ug posibleng nangasuko sa mga bata ug nanimawos.
Samtang ang ubang tinun-an nga nasudlan og dautang espiritu didto gidala sa simbahan sa barangay Buanoy diin giingong nangaulian dangtan og pipila ka oras human giampoan sa mga pastor.
Si PO2 Hannibal Larida kinsa usa sa mga miresponde mibutyag nga ang usa sa mga tinun-an nagpunay og singgit nga dunay mga ‘duwende’ nga nag-ingon kinahanglang bungkagon ang kasilyas sa eskuylahan tungod kay daghan nang bata nga gi-flush didto. Ang maong tinun-an miingon usab sa mga polis nga duna silay nakit-ang nagkadugo nga babaye nga gihinganlan og Arlene sa maong tunghaan.
“Tungod sa kadaghan naglibog mi unsaon pagtabang kay nagkanit-kanit na man gud,” matud pa ni Larida kinsa mibutyag nga gikumpirmar sa pipila ka magtutudlo nga dunay tinun-an kaniadto nga ginganlan og Arlene ang kalit nga namatay sa maong tunghaan sa wala hisayring hinungdan.
“Gipa-inom na sila og holy water pero wala lang gihapon ang uban gipalayo sa lugar mao nangaulian,” matud pa ni Larida.
“Inahan kuno sa engkanto naigo kay gibato man nila ang kahoy kay daghan na mang bunga,” ni Larida pa.
Ang prinsipal sa maong tunghaan wala makuhai og pamahayag bahin sa nahitabo sa iyang tunghaan dihang gisuwayan pagpangita sa Banat News. (BANAT NEWS)