ILOILO CITY, Philippines – Mga umahan sa 18 ka mga lungsod sa probinsya sa Iloilo giatake og mga ilaga sumala pa sa Provincial Agriculturist Office (PAO).
Ang maong mga lungsod mao ang Leon, Alimodian, Sta. Barbara, Leganes, Zarraga, New Lucena, Cabatuan, Mina, Badiangan, Lambunao, San Enrique, Dingle, Dueñas, Dumangas, Anilao, Barotac Viejo, Concepcion ug Estancia.
Samtang ang dunay grabeng problema sa pagdagsa sa mga ilaga nga miatake sa ilang mga umahan mao ang mga lungsod sa Mina, Sta. Barbara, New Lucena, ug Anilao.
Sumala pa sa impormasyon nga nakaylap sa PAO niadtong Hulyo 19, 3, 416.8 ka ektaryang kahumayan ang naapektahan sa maong mga ilaga diin gipangkaon ang mga punoan niini hasta na ang mga semilya.
Ang PAO nang apud-apod na og 645 ka botelyang zinc phosphide sa maong mga apektadong munisipyo.
Ang maong kemikal gihulagway nga epektibong rodenticide nga usa ka matang sa hilo nga isagol sa paon aron kan-on sa ilaga.
Tungod sa maong problema mipatawag na og tigom si Governor Arthur Defensor, Sr. sa mga sakop sa Department of Agriculture (DA) niadtong Huwebes pinangulohan ni DA-6 regional director Larry Nacionales ug mga ginsakupan.
Aron makatabang ang mga mag-uuma nga mapugngan ang pagdaghan pa sa mga ilaga diha sa mga humayan gidasig ni Defensor ang mga tawo nga mangayam pagpangita og mga ilaga aron sila puohon o patyon.
Samtang ang DA officials midasig sa mga mag-uuma nga mohimo og pamaagi sama sa pagsal-ang sa matang sa pananom nga ilang itanom sa ilang mga umahan aron dili makaagni og daghang mga ilaga.(/EIM) (BANAT NEWS)