DTI ug LTO imbestigahon sa capitol

CEBU, Philippines - Imbitahon sa mga sakop sa Hunta Probinsyal sa lalawigan sa Sugbo si Regional Director Asteria Caberte sa Department of Trade and Industry (DTI) ug si Land Transportation Office (LTO) Regional Director Raul Aguilos bahin sa implementasyon sa Mandatory Helmet Act.

 Ang maong pagdapit gipaagi sa gipasar nga resolusyon nga gipangamahanan ni Bokal Jude Thadeus Durano Sybico, ang chairman sa Committee on Trade and Industry sa hunta probinsiyal nga nag-awhag sa LTO ug DTI paghatag og katin-awan kalabot sa pagpatuman ning maong balaod.

 Matud pa sa nahisgutang bokal nga daghan siyang nadawat nga mga reklamo bahin sa giingong dili patas ug dili makiangayon nga pagpatuman sa nahisgutang balaod gikan sa mga motorista dinhi sa lalawigan sa Sugbo. Base sa mandatory helmet act, gimanduan ang mga motorista sa pagsul-ob og helmet nga adunay sticker nga product standard (PS) ug import commodity clearance (ICC) diin ang mapakyas sa pagtuman niini makamulta og P1,500 sa unang paglapas, P3 mil sa ikaduha, P5 mil sa ikatulo, ug P10 mil, ug rebokasyon o pagkanselar sa lisensya sa ika upat nga kalapasan. 

Gusto sa mga magbabalaod sa lalawigan nga masayran nila ang maong balaod aron makatabang sila niini sa pagpasabot sa mga motorista sa kama-hinungdanon sa pagbaton og helmet nga mosakar sa kalidad nga gipangayo sa maong balaod. (BANAT NEWS)