SRP iya sa publiko-Rama

CEBU, Philippines - Giklaro ni Mayor Michael Rama nga walay makadiktar kaniya kung mosulod siya og mga negosasyon sa mga tawo nga buot mopalit og luna sa South Road Properties.

Matud pa sa mayor nga wala pay naumol nga kontrata kung naa pa sa estado sa negosasyon ang pagbaligya sa mga luna sa SRP busa wala siya mahulga sa giingong ordinansa nga gipasar sa Konseho sa miaging adlaw nga nagdili sa mayor nga makabaligya sa luna sa SRP kung walay pagtugot sa konseho.

Una nang gipadayag ni Rama nga wala moagi og public hearing ang maong ordinansa ug kwarta sa publiko pinaagi sa buhis maoy gigamit sa pagkamugna sa SRP maong angayan lang nga nananghid una ang Konseho sa publiko una sila mohimo sa maong ordinansa.

Apan daan nang namahayag ang konseho nga dili na nila kinahanglan pang mananghid sa publiko pinaagi sa public hearing gumikan kay wala man maghisgot og penalty ang maong ordinansa. “Dili ra man kay sila (mga konsehal) ra ang nanag-iya sa SRP, sa tanan (publiko) man na,” matud pa ni Rama.

Mga sakop sa Bando Osmeña Pundok Kauswagan (BOPK) nga kaniadto partido ni Rama mao karoy mayoriya sa Konseho ug mibotar nga mapasar ang maong ordinansa.

Ang ordinansa nagdili sa si bisan kinsa nga makabaligya og luna sa SRP kung dili mananghid sa Konseho.

Bugtong mga kaalyado ni Rama sa konseho mao sila si Konsehal Edu Rama, Joey Daluz ug Edgardo Labella kinsa migawas sa session hall atol sa botasyon sa maong ordinansa. (BANAT NEWS)