Masuso gilabay sa basurahan

CEBU, Philippines - Usa ka bag-ohay pang gipanganak nga batang lalaki ang napalgan sa basurahan human gilabay sa walay puangod nga inahan atubangan sa usa ka establisemento atbang sa San Carlos Boys High School sa may General Maxilom Avenue sa dakbayan sa Sugbo kagahapon sa kaadlawon.

Ang maong bata gihulagway nga bag-ohay pa lang nga natawo may gibug-aton nga 2.25 kilos kasamtangan karong giatiman sa Cebu City Medical Center.

Sa nasayran ang Mobile Patrol Group (MPG) maoy unang nakadawat sa tawag gikan sa establisementong Cherry Court diin gilabay ang bata sa basurahan nga nakit-an sa namunit og basura.

Ang MPG pagkakitang buhi pa ang bata nga giputos og habol ug duna pay pusod daling mitawag sa Emergency Rescue Unit Foundation (ERUF) kinsa daling midala sa bata ngadto sa CCMC.

Si Dr. Catherine Echevarre ang attending doctor sa puya mibutyag sa diha nga nahinabi sa Banat News maayo ang kahimtang sa panglawas sa bata bisan sa kagamay sa timbang niini.

Matud pa ni Echevarre nga daw gigutom og maayo ang puya sanglit dihang gipatutoy kini sa usa ka inahang nagpasuso maayo kining motutoy. Duha ka matang sa antibiotic ang gitaod sa maong puya matag adlaw aron paglikay unya sa posibleng impeksyon tungod kay gibutang kini sa hugaw nga dapit ug karon naa na kini sa Sick Neonate Unit (SNU) matud pang Echevarre.

Samtang ang Department of Social Welfare and Development (DSWD) mao unyay mokuha aron moamuma sa maong puya.

Sa report sa ABS-CBN Central Visayas, si Grace Subong sa DSWD-7 mibutyag nga dili na gyud basta-basta ma-claim sa inahan ang bata tungod sa gibuhat niini. (/EIM) (BANAT NEWS)