Pagbalhin sa VSMMC ngadto sa Mandaue gikabalaka ni Rama

CEBU, Philippines - Dakong supak si Mayor Michael Rama sa plano sa Department of Health nga ibalhin ang Vicente Sotto Memorial Medical Center sa Mandaue City kung diin nahimutang ang Eversely Child Sanitarium (ECS).

Sumala pa ni Rama nga luoy kaayo ang mga kabos gikan sa probinsya nga nagpuyo sa habagatang bahin gumikan kay layo na kaayo ang mahimutangan unya sa pampublikong tambalanan.

Dugang pa sa mayor nga gawas nga layo ang nahimutangan sa ECS lisod usab ang karsada niini hinungdan nga mameligro ang kahimtang sa pasyente kung dunay mga emerhensya nga mahitabo.

Samtang si Kongresista Tomas Osmeña mipadayag nga kung madayon ang plano sa DOH, plano niyang i-take over ang building sa VSMMC aron himuong annex building sa Cebu City Medical Center.

Nagkanayon ang kongresista kinsa makig-atbang kang Rama sa pagkamayor sa sunod tuig, maayo kini nga ideya sama sa plano ni Rama nga tukoran og annex building sa CCMC ang nahimutangan karon sa buhatan sa Bureau of Fire Protection 7. (BANAT NEWS)