Urian gipangita na

CEBU, Philippines - Gipakatap karon sa kapolisan ang ilang mga operatiba ug mga asset sa tibook probinsiya sa Sugbo ug sa kanait nga lalawigan niini sa pagpaniid sa nahimutangan ni Pascual Urian Jr. ang Internal Security sa PAGCOR Casino Parkmall nga mikawat sa P2.8 milyones niadtong Sabado sa kaadlawon.

Si PRO 7 Regional Director P/CSupt. Marcelo Garbo sa press conference kagahapon sa buntag sa dakbayan sa Lapulapu mibutyag nga nakadawat siya og mando  gikan ni DILG Secretary Jessie Robredo   nga ipadakop dayon si Urian.

Gumikan niini nakig-alayon na karon ang kapolisan sa rehiyon 7 ngadto sa kapolisan sa rehiyon 8 aron masipong dayon ang maong kawatan.

Ang tanang posibleng kaagian ni Urian padung sa gawas sa nasud gibutangan na og mga operatiba sa intelligence aron dili kini makaipsot.

Ang mga tinugyanan sa Department of Foreign Affairs ingon man ang taga Bureau of Immigration nakighiusa usab sa kapolisan sa pagbantay sa ilang tagsa-tagsa ka puwesto aron nga madakpan dayon ang maong kriminal.

Si Urian human kawata ang P2.8 milyones gikan sa kaha sa Casino sa Pagcor nga nahimutang sa Park Mall sa dakbayan sa Mandaue niadtong Sabado sa buntag, misabuwak sa P80 mil nga pulos de papel ngadto sa atubangan sa maong mall dayong sibat niini sakay sa usa ka taxi. (BANAT NEWS)