Hangyo sa kampo ni Castro ipasupak

CEBU, Philippines - Gimandoan sa korte ang Cebu City Jail nga moduso sa ilang oposisyon batok sa hangyo sa kampo ni Rolien Castro nga dili siya ipaslak sa city jail   nga nahimutangan ni Junjun Cabando ang lider sa ilang grupo sa mga tulisan.

Si Regional Trial Court Judge Wilfredo Navarro sa Branch 19 maoy mimando sa tagdumala sa Cebu City Jail kinsa mihatag og lima lang ka adlaw sa mga opisyal sa maong prisohan sa paghimo niini. Nasayran nga si state prosecutor Aida Sanchez maoy mimanipesto nga angayang hatagan og higayon ang city jail nga makapasabot kun ikapasalig ba nila ang seguridad sa kinabuhi ni Castro sulod sa maong prisohan diin anaa usab ang kauban niyang si Cabando.

Matud pa niya nga may katungod ang mga tinugyanan sa city jail kalabot ning maong isyu.Ang legal counsel ni Castro nga si Atty. Rameses Victorious Villagonzalo mibutyag sa mga tigbalita nga moduso sila og mosyon aron makapiyansa ang iyang kliyente   sa dili pa ang arraignment niini karong umaabot nga Agusto 14 ning tuiga.

Matud pa ni Villagonzalo nga buhaton nila kini tungod kay ilang nakita nga hilabihan kahuyang ang kaso nga gisang-at sa kapolisan batok kang Castro busa makatarunganon lang nga dili kini itipon pagpriso sa bilanggoan nga napaslakan usab si Cabando.

Samtang ang korte mipagawas na usab og commitment order batok kang Merly Laguitao ang gihulagway nga look out sa nahitabong tulis sulod  sa usa ka mall duol sa Fuente Osmeña, ning dakbayan sa Sugbo sa miaging tuig.

Sa samang higayon mipagawas na usab ang korte og warrant batok kang Francis Raagas usa sa mga John Does nga kauban ni Cabando dihang gitulis niini ang teller sa bangko diin nasakiyo nila ang P1.2 milyones sulod sa nahisgutang mall.

(BANAT NEWS)