Bucao nahiubos kang Recamara

CEBU, Philippines - Si Talisay Vice Mayor Alan Bucao nasagmuyo tungod sa kapakyas sa hepe sa kapolisan sa siyudad pagpahibawo kaniya nga giilisan diay niini ang traffic division chief sa Talisay.

Si Bucao kinsa maoy chairman sa City of Talisay-Traffic Operation Development Authority (CT-TODA) nagkanayon nga bag-o lang siyang nakadawat sa report bahin sa maong isyu.

Ang bise mayor mipasabot sa iyang pagmahay kang Supt. Eddie Recamara, ang hepe sa kapolisan sa siyudad gumikan kay wala kini magpahibawo kaniya sa maong kalamboan.

“Being the chairman sa committee on peace and order and at the same time chairman sa CT-TODA nindot siguro kung tagaan ta og gamay’ng respeto ba, pahibaw-on unta ta kung kinsay bag-ong hepe sa polis sa trapiko but sad to know nga wala ko kahibawo”, ni Bucao pa.

Midugang siya nga ang nagdumala sa CT-TODA karon nakapangutana usab niini apan miingon siya   nga wala siya masayud niining tanan.

Samtang si Recamara sa iyang bahin, nagkanayon nga human nabalhin mga duha ka buwan na ang nakalabay ngadto sa Minglanilla Police Station   si Inspector Ricardo Echavez, ang kanhi hepe sa traffic dvision, ubay-ubay siyang nadawat nga reklamo sa trapiko ug tungod niini temporaryo niyang gibutang isip hepe sa traffic division si SPO4 Cleopas Bonjoc aron adunay magdumala sa mga problema kalabot sa trapiko sa siyudad.

Matud niya nga wala na lang una siya mopahibawo kang Bise Mayor Bucao tungod kay temporaryo lang ang posisyon karon ni Bonjoc samtang wala pay laing opisyal nga nadestino sa Talisay City Police Station nga haom nga molingkod sa maong katungdanan.

Si Recamara nagkanayon nga opisyal ang angayang palingkuron sa maong puwesto aron iya kining ikarekomendar ngadto sa CT-TODA. - BANAT NEWS