Council resolution gikuwestiyon ni Rama

CEBU, Philippines - Si Mayor Michael Rama mikwestiyon sa gi-aprobahan nga resolusyon sa konseho kagahapon nga nag-protehir sa South Road Properties (SRP) ug nagpugong kaniya ug uban pang mga opisyal sa siyudad gikan sa pagpamaligya sa mga luna sa SRP kung wala’y pagtugot sa konseho.

Nagkanayon si Rama nga   dili maayong dili moagi og public hearing ang maong resolusyon   tungod kay ang SRP dili iya sa mga opisyal sa kagamhanan kun dili iya sa katawhan. Samtang ang nangamahan sa maong resolusyon nga si Noel Wenceslao misaysay nga dili na kinahanglan nga ipaubos kini sa public hearing gumikan kay wala maghisgot og penalty ang maong resolusyon.

Apan sa habig ni Rama miklaro kini nga kinahanglan gyud nga paminawon ang sentimento sa publiko gumikan kay ang residente sa Dakbayan sa Sugbo maoy nanag-iya sa SRP, ila   mang buhis ang gigamit sa pagpatukod niini.

Matud pa sa mayor nga kinahanglan nga hatagan og respito ang habig ang publiko aron nga morespeto  usab kini sa namunoan ning siyudad.

Alang kang Rama nga kun mopasulabi sa kabubut-on sa katawhan nga dili ikabaligya ang mga luna sa SRP , wala siyay tutol niini .

Gihulagway sa mayor ang konseho nga abusado gumikan kay wala kini nagpakabana sa tingog sa mga katawhan.

Nasayran usab nga nanggawas sa session hall ang mga kaalyado ni Rama kay nanggawas kini atol sa botasyon sa maong resolusyon.

Ang mga konsehal nga kaalyado sa mayor naglangkob nila ni Edu Rama, Joey Daluz ug Edgardo Labella.

Una na nga gipadayag sa mayor nga barugan gyud niya ang iyang desisyon nga ibaligya na ang pipila ka luna sa SRP aron makaumol kini og daghang trabaho alang sa mga Sugbuanon. - BANAT NEWS