CEBU, Philippines - Nabuang sa "E-Games" (usa ka on-line game sa casino) security guard nga mikawat sa P2.8 milyones sa kaha sa PAGCOR didto sa Park Mall sa dakbayan sa Mandaue sa miaging kaadlawon.
Mao kini gibutyag sa pipila ka mga sakop sa PAGCOR nga nahinabi sa Banat News kagahapon kinsa nagkanayon nga si Pascual Urian Jr. upat na ka tuig nga nagserbisyo sa maong sugalan sa goberno.
Matud pa sa mga kawani sa maong sugalan nga wala magpaila nga nadiskitahan nila nga nabuang sa E-games sa casino si Urian.
Gawas sa E-games nabuang usab sa gidiling drugas ang maong guwardiya hinungdan nga nagkinahanglan siya kanunay og daghang kuwarta aron itubag sa iyang bisyo.
Si P/CInsp. Michael Anthony Bastes sa Mandaue City Police Office mibutyag sa mga tigbalita nga padayon pa nilang gipangita si Urian.
Niadtong Sabado sa kaadlawon human kawata ni Urian ang P2.8 milyones gikan sa kaha sa Casino gisabwag ang P80 mil niini dayong sakay sa taxi ug misirit nga hangtud karon wala hisayri kun asa na na siya. (BANAT NEWS)