Polis giatake sa sakit namatay
CEBU, Philippines - Namatay ang usa ka polis dihang giatake kini sa diabetes sa gawas sa iyang balay sa barangay Poblacion, lungsod sa Carmen kagahapon sa alas 7:00 pasado sa buntag.
Ang biktima mao si SPO4 Cristopher Sanchez, 46, lumad nga taga lungsod sa Tuburan ug kasamtangang nagpuyo sa maong lugar ug nadestino sa Carmen Police Station.
Si SPO4 Sanchez kinsa manghud ni Busay barangay Captain Eleodoro “Yody” Sanchez nga komentarista sa Bantay Radyo niadto lang Biyernes migawas gikan sa tambalanan.
Si SPO3 Renerio Masocol, imbistigador sa Carmen Police Station mibutyag sa Banat News nga padung na unta si Sanchez ngadto sa buhatan sa kapolisan sa Carmen kay mobalik na unta siya sa pag-duty kagahapon
Apan matud pa ni SPO3 Masocol nga human makasul-ob sa iyang uniporme ug mibakos na sa iyang hawak sa iyang service firearm si Sanchez migawas dayon sa iyang pinuy-anan apan kalit lang kining nalup-og sa yuta.
Gihatud dayon kini sa iyang pamilya ngadto sa Danao District Hospital apan kagahapon sa alas 8:20 sa buntag gideklarar siya nga patay na.
Matud ni SPO3 Masocol nga ang sakit nga diabetes ni Sanchez mikomplikar sa iyang kasing-kasing.
Gikan siya sa Tabuelan Police Station ug niadto lang Disyembre sa miaging tuig siya nabalhin og destino sa Carmen Police Station. (/WC)(BANAT NEWS)
- Latest
- Trending
