Overcharging nga mga drayber

CEBU, Philippines - Ang mga drayber sa public utility jeepneys (PUJ) nga dili mohatag og tukma nga sukli ngadto sa ilang mga pasahero mahimong ireklamo sa hingtungdan ngadto sa operations branch sa Land Transportation Office.

Daghang mga PUJ drivers nga mopabayad gihapon og P8 sa ilang mga pasahero sa labing duol nga destinasyon. Ang ubang drayber hinuon modawat ra usab og P7 kun adunay mohatag nga walay sensiyo.

Apan nabantayan sa Banat-Manobela nga dunay mga PUJ drayber nga motuyo gyud sa pagkolekta og P8 sa labing duol nga destinasyon. Kining reporter mituyo pagsakay sa PUJ nga biyahe og Guadalupe-Carbon gikan sa Abellana National School.

Ang tibuok P10 gisuklian lang sa drayber og P2, nga nagpasabot nga P8 ang iyang gikuha sa duol kaayo nga destinayon.

Duha ka managhigala nga babaye nga misakay usab sa mao nga PUJ mitunol og tibuok P20 apan gisuklian gihapon og P4. Nagpasabot kini nga tag P8 gyud ang iyang singil sa plete kay mahimo man nga suklian niya’g P5 ang pasahero.

Ang dakbayan sa Sugbo adunay “existing ordinance” nga ang mga drayber kinahanglang magtinil og igong gidaghanon nga sensiyo aron ilang ikapanukli apan wala kini matuman.

Ang mga drayber nga susama niini mahimong ireklamo og “overcharging.” Si LTO-7 Assistant Regional Director Arnel Tancinco midasig sa publiko nga moreklamo kun pasobrahan ang pagkolekta sa plete sa mga drayber og public utility vehicles, sama sa PUJ, bus ug taksi.

Matud ni Tancinco nga kadtong moreklamo sa LTO kinahanglan nga mokuha sa plate number sa sakyanan, sa rota kun kini PUJ o bus, dayon ang oras ug dapit diin mahimo ang salaud aron sayon ra nga madakpan ang abusado nga drayber. (BANAT NEWS)