Polis nga may arrest order gisikop

CEBU, Philippines - Usa ka polis nga nag-atubang og kasong frustrated murder nasikop sa mga sakop sa Criminal Investigation and Detection Group (CIDG) didto sa San Fernando Police Station sa lungsod sa San Fernando, Cebu kagahapon sa buntag.

Si PO3 Leoncio Salubre, 49, lumad nga taga siyudad sa Naga, kasamtangang nadestino sa San Fernando Police Station.

Sa pakighinabi sa Banat News ni SPO2 Ruel Leyson, sa CIDG, nasayran nga ilang nadawat ang warrant of arrest batok kang Salubre gikan ni RTC Branch 10 Judge Soliver Peras sa miaging adlaw.

Matud pa ni Leyson nga ang nakatala sa warrant of arrest mao ang kaso ni Salubre nga frustrated murder nga nahitabo pipila na ka tuig ang milabay.

Gibutyag ni Leyson nga nakig-alayon ang kapolisan nga sakop sa CIDG sa kapolisan sa lungsod sa San Fernando hinungdan nga dali rang nasikop si Salubre.

Ang hepe sa kapolisan sa lungsod sa San Fernando nga si Insp. Crisanto Abella, mibutyag usab sa Banat News nga boluntaryong mitahan si Salubre ngadto kanila sa diha nga nasayran niini nga aduna siyay warrant of arrest. Gihulagway ni Abella nga usa ka aktibo ug matinud-anon sa iyang pagka-polis si Salubre hinungdan nga wala siya’y masaway niini.

Dugang pa ni Abella nga karong adlawa posibling mopiyansa si Salubre og P200 mil alang sa temporaryo niyang kagawasan.

Wala usab modetalye si Leyson bahin sa kaso ni Salubre tungod kay wala kaayo siya’y kasinatian niini.

Sa nasayran, si Salubre maoy gipasanginlang mipusil sa usa ka Jerson Granton niadtong buwan sa Oktubre tuig 2005 apan gihimakak ni Salubre ang maong pasangil.

Sa pagkakaron gibalhug siya sa prisohan sa CIDG.  WC  - BANAT NEWS