CEBU, Philippines - Namatay ang usa ka negosyante human sumbaga sa usa ka barangay tanod didto sa barangay Lamintak Norte sa lungsod sa Medillen sa miaging hapon. Ang biktima mao si Marciano Caparoso Jr., 44, minyo, nagpuyo sa maong lugar ug mamalitay og scrap iron.
Samtang ang suspek mao usab si Josephus Openya, 27, ulitawo, nga silingan sa biktima ug usa ka tanod sa maong barangay.
Si PO3 Rolland Rubin sa Medillen Police Station mibutyag sa Banat News nga ang biktima ug ang suspek nagkalalis bahin sa anak sa nahauna nga giingong gisumbag sa naulahi atol sa pagduwa nila og basketball sa ilang barangay sa miaging adlaw.
Maoy hinungdan nga dihang nakit-an sa biktima ang suspek didto sa basketball court iya dayon kining gikomprontasi.
Ang suspek nga naglagot, kalit nga mipalupad sa iyang kumo nga didto motugpa sa ibabaw sa tuong kilay sa biktima ug maayong pagkagisi niini.
Tungod sa kahadlok nga usban pa siya og sumbag mikaratil og dagan ang biktima pahilayo sa maong dapit nga nag-agas ang dugo sa iyang nawong.
Apan pipila ka metros gikan sa dapit diin siya sumbaga kalit kining nahagba ug nakuyapan.
Didto gitabang ang biktima ug gihatud dayon sa mga tawo sa maong lugar ngadto sa Cebu Provincial Hospital nga kanhi Verallo District Hospital sa siyudad sa Bogo apan gideklarar kini nga dead on arrival.
Samtang ang suspek nadakpan usab dayon atol sa hot pursuit operation human kini misuway og ikyas ug nabalhug na karon sa karsel samtang gihikay na ang kasong ipasaka batok kaniya. WC - BANAT NEWS