CEBU, Philippines - Gigahinan sa lalawigan sa Sugbo og mga P5 milyones nga salapi isip counterpart niini sa gasto nga gibubo sa Ramon Aboitiz Foundation Inc.(RAFI) alang sa pasiuna nga pagpang-ayo sa 14 ka mga tulunghaan sa kagamhanan sa lungsod sa Asturias. Gibutyag kini ni Governor Gwendolyn Garcia ngadto sa mga molupyo sa maong lungsod atol sa iyang pagpamulong sa pag-turnover sa RAFI sa upat ka mga bag-ong inayo nga mga school building sa upat ka tulunghaan sa nahisgutang lungsod.
Matud pa ni Garcia nga ang nagasto sa RAFI sa pagpaayo sa maong mga tulunghaan gibanabana nga mokabat sa P15 milyones.
Gipabati usab sa Deputy director for operation Amaya Aboitiz sa RAFI nga magpadayon ang ilang pag-abag sa lalawigan sa Sugbo sa natad sa edukasyon.
Subay niini gipadangat sa gobernador ang iyang pasalamat ngadto sa kahitas-an nga sa iyang mga gimbuhaton aduna gayuy mitabang kaniya.
Sa samang higayon nanghinaot usab siya nga dili pul-an ang RAFI sa pagtabang sa kagamhanan sa paghatud sa mga basic services ngadto sa katawhan. (BANAT NEWS)