Epekto sa BRT sa kalikopan gitun-an

CEBU, Philippines - Gipaniguro sa kagamhanan sa Siyudad sa Sugbo nga dili maapektohan ang kalikopan sa padaganon dinhi nga Bus Rapid Transit (BRT) Project. Sumala pa sa environment specialist sa Woodfields Consultants Inc. nga si Dr. David Green nga gitutokan nila karon ang nagkadaiyang isyu bahin sa kalikopan busa nakig-alayon na sila sa tanang mga stakeholders   nga may kalabtanan sa maong proyekto.

Ang Woodfields maoy naniid   sa mahimong resulta sa ipadagan nga   BRT sa palibot sa Sugbo ug mipasalig   kini nga mohimo og mga pamaagi sama sa pagama og “noise and just control plan”.

Dugang pa ni Green nga matag proyekto nila mag-agi gyud sa higpit nga pag-usisa   sa mga tinugyanan sa Department of Environment and National Resources (DENR) . Kini tungod kay ang maong ahensya maoy gitahasan sa pagluwat og mga lakang sama sa panginahanglan una tugoti nga ikapadagan ang unsa mang proyekto   nga makaapektar sa palibot ug sa katawhan.

Samtang gipadayag sa taga Woodfields nga dako kaayo og bintaha ang serbisyo sa BRT ngadto sa publiko gumikan sa ka-paspas sa biyahe niini nga luwas kanunay   sa mga aksidente sa kadalanan.

Usa sa gilantaw nga posibilidad inigsugod sa konstruksyon sa mga agianan sa BRT mao ang disturbo niini ngadto sa maong mga dapit nga maglakip sa koneksyon sa komunikasyon, supply sa kuryente, ug supply sa tubig.

Mao kini ang gitun-an nila karon pag-ayo aron mokooperar usab ang mga pribadong ahensya nga naghatod sa maong mga serbisyo sa komunikasyon, tubig ug suga ning dakbayan.

Ang kolor sa BRT gipaagi sa usa ka survey nga gipahigayon sa City Hall alang sa publiko ug mga dagkong tindahan sa siyudad nga gipahigayon sa miaging mga buwan. (BANAT NEWS)