Ginikanan nangreklamo
Dili tingale tikasan apan matawag og mapahimuslanon kining pipila ka mga vendor og isda. Panahon sa hangin-hangin, ulan-ulan ug magdaot ang panahon ilang usbawan ang presyo sa matag kilo sa isda sa katarungan nga nihit ang kuha. Wala kaayo’y managat tungod sa dautang panahon. Sila mosakay sa kahigayonan pinaagi sa pagpahimulos sa pagpasaka sa presyo.
* * *
Nangreklamo ang mga ginikanan sa mga vendor sa sidewalk ug sa duol sa eskuylahan. Daghang baligya nga mga dulaan nga naghaylo sa kabataang nagtungha. Walay kapuslanan kay barato tuod apan daling maguba. Laing reklamo sa ginikanan kining nagpasiugda o nagnegosyo og kompyuteran. Adunay dili manulod sa klase kay adto magyampungad sa computer kay naadik na sa computer games busa adto ra mahurot ang kwartang gipabawon. Dili na sila kaatiman sa ilang pag-eskuyla, dugay mopauli ug napilde pa gyud ang kwarta. Daghang nagbagulbol nga mga ginikanan apan mas bintaha nalang kini sa kabataang nag-shabu.
* * *
Best of Dalaguete ang Mantalongon Vegetable Market. Gitawag og vegetable bowl of Cebu , bagsakan o wholesale trading post. Kada adlaw ang baligya nga klase-klasing utanon ilabi na sa adlaw’ng Huwebes. Naglakip sa cabbage, petchay, lettuce, sayote, talong, carrots, mais, ahos, luy-a, kamunggay, repolyo, cauliflower, sili, baguio beans, sikwa, takway, gabi, patani, karabansos, pepino, paliya, sibuyas bombay, sibuyas dahonan, lagotmon, prutas ug uban pa. Hilig usab sa pamaligyag torta ug banana meat. Gumikan sa bugnaw nga klima sa Mantalongon haom sa pagpananom. Gihulagway nga Little Baguio of Cebu. Mga mag-uuma magsambilay og mga dagkong bukag sa buko-buko nga isab-it sa ilang ulo dalang lukdo sa nagtipun-og nga mga utanon sa gibug-aton nga 90-140 libras. Ang ubang produkto itumod sa lungsod ug sa kamerkadohan sa siyudad sa Sugbo. Wala nay illegal structure nga nasal-ot sa Mantalongon Vegetable Market human ipademolis sa mayor sa Dalaguete niadtong 2010.
* * *
Ang umahan sa Mantalongon, Dalaguete anaa sa tiilan sa kinatas-ang bukid nga gitawag og Osmeña Peak buyon sa bukid sa Patong, Badian. Inig tungtong sa ibabaw sa bungtod bantang nga makita ang lungsod sa Moalboal ug Pescador Island. Ang maong isla anaa sa Tañon Strait sa kasadpang baybayon nga hugopan sa mga mananagat ubos sa pagdumala sa kagamhanan sa Moalboal. Gibantayan sa ilegal nga pangisda ang palibot sa Pescador island ilabina sa diving site ug sa marine park nunot sa pagpanalipod sa presensya sa mga bao, pawikan, frog fish ug matahom nga kagasangan. Wala pa hinooy butanding nga nasaag.
* * *
Gawas sa tabo sa Papan, Sibonga ug Mantalongon, Barili matag Huwebes duna sab didto sa San Antonio satellite public market kada Martes ug Biyernes. Malamboon ang maong merkado nga nahimutang mga napulo ka kilometro gikan sa siyudad sa Bogo sa amihanang lalawigan. Mag-abot ang mga pumapalit ug mga vendor sa mga utanon, prutas, lagotmon ug ubang produkto lakip na ang gitumod nga mga hayopan sama sa baboy, kanding, baka ug kabaw.
* * *
City Health Officer sa Lapu-lapu nga si Dr. Rodulfo Berame nakadawat og reklamo sa kabaho sa dakong piggery sa Mahayahay, Bangkal. Nangreklamo ang mga lumolupyo nga wala na sila makahanggab og presko nga hangin. Nahinumdom ko sa vendor sa usa ka lungsod nga mireklamo sa usa ka poultry farm kay misalom ang mga langaw sa utan nga monggos nga gikaon sa iyang mga customer. Nahimong subak ang langaw.
* * *
- Latest
- Trending
