3 naghikog gumikan sa sakit

CEBU, Philippines - Mga balatian sa lawas maoy hinungdan sa paghikog sa tulo ka edaran sa managlahi nga oras ug lugar sa dakbayan ug lalawigan sa Sugbo kagahapon.

Ang mituyo sa pagpakamatay mao sila si Cecelia Jaboneta, 72, taga sitio Kamanse, barangay Mambaling ning dakbayan sa Sugbo, Alfredo Alin, hingkod, minyo ug barangay tanod sa barangay Danlag, lungsod sa Consolacion ug Godofredo Biay Arnival Jr., 63, mekaniko nga taga sitio Greenland San Valley, barangay Calamba ning dakbayan sa Sugbo.

Si Alin kinsa nag-antos sa sakit nga diabetes naghikog pinaagi sa pagpusil sa iyang dughan gamit ang 38. kalibre nga revolver sa sulod sa ilang balay kagahapon sa alas 7:00  pasado sa buntag.

Si PO1 Baltazar Francisco sa Consolacion Police Station mibutyag sa Banat News nga sa wala pa maghikog, si Arnival giingong naghilak kini sa kasakit sa iyang atay ug kasingkasing, base sa asoy sa asawa sa biktima. Matud pa ni PO1 Francisco nga didto sa gawas sa ilang balay ang asawa ni Arnival dihang nadungog niini ang buto sa armas ug sa pagsusi niya niini nasuta niya nga nalup-og na kini sa hawanan sa ilang balay nga naglunang sa kaugalingong dugo ug namatay diha-diha.

Samtang sa pagka-alas 11:00 kagahapon sa buntag si Jaboneta nakit-an sa iyang apo nga nag-ubo sa sawog nga samdan ang dughan sa gunting nga gigamit sa pagdunggab sa iyang kaugalingon, wala nay kinabuhi sa sala sa ilang balay.

Sa pakighinabi sa Banat News ni PO3 Lou Pagara sa Cebu City Police Office, Homicide Section mibutyag nga dugay nang nag-antus sa sakit sa buko-buko si Jabonita.

Samtang sa miaging gabii si Arnival nagpakamatay gamit gihapon ang iyang armas de fuego nga wala masuta ang kalibre.

Sumala sa kapolisan nga si Albina nga asawa ni Arnival mitunol niini og kuwarta aron isuweldo sa iyang mga trabahante sa iyang shop.

Unya human niini og panuweldo, giingong misulod kini sa ilang lawak ug didto nabati nalang sa tanan ang buto sa armas.

Dihang gisusi sa asawa nalup-og na sa sawog nga dugoon si Arnival kinsa dihadiha nakabsan sa kinabuhi.

Nagduda gihapon ang asawa nga gikaguol sa iyang bana ang sakit gihapon sa lawas nga gihambin niini. (/WC)(BANAT NEWS)