Menus ang kita sa bus drivers tungod sa fixed-salary scheme

CEBU, Philippines - Gibutyag sa presidente sa Cebu Provincial Bus Operators Association Richard Corominas nga niminus ang kita sa mga driver ug konduktor itandi sa kaniadto nga commission basis ang paagi sa ilang sweldo.

Si Corominas nga nahinabi sa Banat News mibutyag nga susama sa nagbasol ang mga driver sa gipatumang fixed salary sa Department of Labor and Employment ug Land Transporation Office.

 “Nanghinayang man sila kay minus man sila og kita karon kompara sa una nga patakaran nga mas dako sila og kita,” pasabot pa ni Corominas.

Matud pa ni Corominas ang mga drayber ug konduktor kinahanglan nang mopanso sa ilang pagsulod ug pag-uli, duna na usab silay payroll subay sa gimando sa labor code.

“Mao man nay gipatuman sa balaod motuman na lang gyud ta, ug mag overtime sila atong bayaran kun mogikan sila naa gyuy punch- in ug moabot sad sila sa ilang paingnan naa say panso,” matud pa ni Corominas.

Hinuon komparar sa komisyon ang basehan sa mga drayber, aduna na silay mga benepisyong susama sa mga trabahante, duna silay sick leave, paternity leave ug overtime.

Sa habig sa mga pasahero, mas luwas sila sa ilang pagsakay tungod kay ang mga drayber dili naman maglumbalumba aron makauna sa mga pasahero maong layo ra sa disgrasya.

Sayo ning semanaha ang mga transport group sa National Capital Region (NCR) miduso og petisyon ngadto sa Korte Suprema aron ideklarar kining ‘unconstitutional.’

Sa unang desisyon mipagawas og temporary restraining order ang Labaw’ng Hukmanan apan pagkasunod adlaw gibakwi kini sa gihimong special session sa en banc sa maong korte tungod kay wala mapaminaw ang habig sa DOLE ug LTO bahin niini. (BANAT NEWS)