Bisekleta, kariton, traysikad bawal na sa CSCR

CEBU, Philippines - Human sa ulahing aksidenteng nahitabo diha sa Cebu South Coastal Road habig sa sitio San Rafael, barangay Tanke, dakbayan sa Talisay ang hepe sa kapolisan sa siyudad nga si Supt. Eddie Recamara mibahad nga sikopon na nila ang mga magbisekleta ug traysikad sa nahisgutang karsada. Kahinumduman nga niadtong Miyerkules si Ryan Alegado residente diha sa lugar kinsa nagsakay og bisekleta subay sa gutter sa karsada ang namatay human napasok ilawom sa dump truck.

“Unang-una, this is a national road, bawal gyud nang mosulod ang mga traysikad diha, even tricycle,” matud ni Recamara.

Apan gipasabot niya nga ang implementasyon sa pagpanakop niini dili sa kapolisan tungod kay ubos na kini sa City of Talisay-Traffic Operation Development Authority (CT-TODA). Hinuon matud niya nga tungod sa ulahing hitabo isugyot niya kini ngadto sa CT-TODA nga makigtinabangay sa barangay ug sa kapolisan aron malikayan ang lain pang disgrasya.

Apan ang hepe mibahad kini nga kung duna silay maagiang mga traysikad ug bisekleta diha sa Cebu South Coastal Road sikupon gyud nila kini. Matud sa hepe peligro alang sa mga magbisekleta ug mga hinay nga matang sa sakyanan ang pag-agi sa susamang mga dalan tungod kay sagad sa mga sakyanan nga mangagi paspas ug dagko. (BANAT NEWS)