Hangyo sa mga PWD suportado

CEBU, Philippines - Suportado ni Mayor Michael Rama ang hangyo sa mga person with disabilities (PWD) kon may apan sa panglawas nga unta anha   lang sa unang andana ang ilang presinto matag piniliay.

Nasayran nga adunay ubang mga PWD ang mawad-an og gana nga mobotar panahon sa piniliay ilabi na niadtong mga nahimutang sa presinto nga tua sa tag-as nga andana sa voting center.

Usa sa tataw nga katarungan mao nga maglisud sila sa pagsaka-saka ilabi na sa mga bakol, buta ug uban pang botante kansang kahimtang sa panglawas di normal. Maoy hinungdan nga gipahibalo sa mayor nga mosuway siya og suwat ngadto sa Commission on Elections aron matun-an ang maong sugyot.

Dugang pa ni Rama nga gusto niyang ipatigbabaw ang katungod sa mga PWD sa pagpili sa gusto nilang mga lider nga maoy mohupot sa renda sa pang-gobiyerno.

Busa iyang gipanghinaut nga hatagan kining maong katuyoan og pagtagad sa taga Comelec. Ang maong plano naumol human sa tigom kagahapon sa Cebu City Hall nga gitambongan sa nagkadaiyang representante sa Department of Social Welfare and Services (DSWD).

Ang maong tigom may labot sa kasaulogan karong sunod semana sa National Disability Prevention and Rehabilitation Week diin ang nagkadaiyang kalihukan gitanyag ngadto sa mga PWD.

Samtang usa ka bakol nga ginganlan og Anor Taganado, 42, mitug-an sa Banat News kagahapon nga aktibo siya sa pagbotar matag piniliay kaniadto apan sukad niadtong piniliay sa 2010 , wala na siya mobotar gumikan kay nahimutang sa layo nga andana ang iyang presinto.

Sumala pa ni Taganado nga maglisod na siya og saka gumikan sa kaluya sa iyang lawas busa mas gipili niya niadtong higayona nga mouli na lang sa ilang balay.

“Dili man gud lalim mosaka pa sa taas na kaayo nga hagdan , sayang kaayo kay dili na hinuon ko kabotar,” dugang pa ni Taganado. (WC)  (BANAT NEWS)