Duha patay sa pagpamusil ug dunggab

CEBU, Philippines - Duha patay sa managlahing insidente sa pagpamusil ug pagpanunggab sa dakbayan sa Sugbo kagahapon sa kaadlawon.

Alas-2 sa kaadlawon kagahapon, usa ka 38-anyos nga taho vendor ang gidunggab ug namatay tungod sa panaglalis sa sugal nga tong-its sa iyahang kaubang tigpamaligya og taho dinha sa barangay Basak Pardo.

Ang biktima giila sa kapolisan nga mao si Feliciano Ubas, molupyo sa sitio Kabayoan, sa naasoy’ng barangay kinsa napalgan na lang nga naligo sa kaugalingong dugo ug may samad dinunggaban diha sa gawas sa ilang balay.

Ang kapolisan padayong nangita sa gitumbok nga suspek nga si Reynaldo Delposo Jr., 47, kinsa daling miikyas ug giingong maoy gikalalis sa biktima sa wala pa mapalging patay si Ubas.

Sa pasiunang imbestigasyon ni SPO4 Alex Dacua sa Homicide Section sa Cebu City Police Office ang asawa ni Ubas nga si Virginia mibutyag nga nakadungog siyang nagkaguliyang diha sa gawas sa ilang balay.

Sa iyang pagabli sa pultahan nakugang na lang siya nga nagbuy-od na ang iyang bana ug nagkadugo hinungdan nga dali nila kining gitabang ug gidala sa Cebu City Medical Center (CCMC) apan patay na kini. Singko minutos sa wala pa ang maong hitabo, usa ka 42-anyos nga lalaki usab ang gipusil-patay sa wa mailhing tawo diha sa barangay Camputhaw nga giilang si Melacio Balmori Jr., 42, molupyo sa maong dapit.

Si Balmori napalgang patay na sulod sa kwartong gipanag-iya ni Requina Osorno. Ang biktima nakaangkon og daghang mga samad pinusilan sa kalawasan.

Sa gihimong imbestigasyon nila ni Dacua uban sa mga sakop sa Crime Scene Investigation Unit (CSIU), uwahing nakit-ang buhi ang biktima nga nagduwa og pinball nga tagakan og piso.

Samtang kini nagduwa kalit nga misulod ang duha ka wala mailhing mga lalaki ug gipusil si Balmori ug daling nangikyas palayo.

Ang kapolisan padayon pang nag-imbestigar sa maong managlahing pagpatay nga pulos may kalambigitan sa sugal. (BANAT NEWS)