CEBU, Philippines - Nagtingkagol sa prisohan ang usa ka suspetsadong kawatan human kini hidakpi sa kapolisan didto sa barangay San Isidro, dakbayan sa Talisay kagahapon sa kaadlawon.
Ang suspetsado mao si Edmar Najera, 30, ulitawo nga taga barangay Pooc, sa maong dakbayan. Gisikop siya sa kapolisan tungod sa kadaghang dala niining mga butang nga iyang kinawat gikan sa balay ni Denie Quiambao, 37, taga Carmen Village sa maong dakbayan.
Ang maong mga butang naglakip sa usa ka grinder, Percussion drill, cell phone ug usa ka bag nga tanan gibana-bana nga mokabat sa P37,000.
Sumala ni PO2 Roy Lofranco sa Talisay City Police Office nga nag-roving sila didto sa San Isidro dihang nasigpatan nila ang suspek nga nagsanuoy sa daghang dala niini. Dihang ilang gisukit miangkon ang maong suspek nga gikan sa balay ni Quiambao ang maong mga butang.
Busa ila kining gidala ngadto sa balay ni Quiambao ug dihang nakonpirmar sa biktima nga iyang mga butang ang gi-harvest sa suspek diha-diha iya kining gipapriso samtang giandam na niya ang kaso nga isang-at batok sa suspetsado (BANAT NEWS)