Mantayupan falls nauga tinubdan didto migawas sa ubos

CEBU, Philippines - Nahubas ang Mantayupan falls sa lungsod sa Barili tulo kaadlaw human mibutho ang sinkhole sa Mantayupan river Miyerkules sa udto sumala pa sa mga geologist nga misusi didto kagahapon.

Matud pa ni Abraham Lucero Jr., Senior Science Research Specialist-Geologist sa Mines-Geosciences Bureau-7, nga ang pagkahubas sa tubig sa falls posibleng mo-resulta sa pagkaguba sa panginabuhian ug turismo sa maong lugar apil na ang ilang mini-hydro-electric power plant.

Si Lucero midugang nga aron mabalik ang tubig sa falls himoan nila kini og 40 metros nga laing agianan aron malikay sa sinkhole ang tubig gikan sa tubod lahos ngadto sa falls.

Si Lucero mibutyag nga ang tubig adto mosulod sa sink hole ug molugwa sa tiilan sa ikaduhang falls gibanabanang 70 metros gikan sa main falls.

Ang sinkhole nahimutang mga 375 metros gikan sa gibuthoan sa tubig ug mga 30-metros gikan sa main falls.

“The sinkhole was estimated 4.5 meters deep but we do not know if duna pa’y liko-liko sa ilawom,” matud niya.

Si Lucero mipahibalo nga ginadili na ang paggamit og mga heavy equipment duol sa sapa aron malikayan ang posibleng pagkahunlak so yuta. “We do not know if unsa kadako ang cavity sa ilawom sa careful lang una especially sa mga tawo nga mutan-aw gyud sa sinkhole,” si Lucero mibutyag.

Matud pa ni Lucero nga dili pa gyud matino kun ang gihimong eco-tourism development sa lugar maoy nakaingon sa sinkhole sanglit naglinog pipila ka semana na ang nakalabay sa maong lugar.

Si Gob. Gwendolyn Garcia mipasusi na kung duna bay koneksyon ang operasyon sa hydro-electric plant ug quarrying sa maong lugar ang nahitabo. (BANAT NEWS)