Babaye gi-salvage gilabay sa Naga

CEBU, Philippines - Usa ka batan-ong babaye ang napalgang patay ug naghubo na ang lawas nga gilabay daplin sa dalan nga gidudahang gituok sa mga kriminal gamit ang iyang kaugalingong sinina diha sa bukirang bahin sa barangay Cantao-an sa siyudad sa Naga kagahapon sa alas 6:00 sa buntag.

Ang biktima nga padayon pang giila sa kapolisan gihulagway lang nga batan-on pa, gamayon ang lawas, nagkarsones na lang kini dihang nakit-an nga nag-ubo sa kasagbutan.

Matud ni PO1 Cleofas Cabrera sa Naga City Police Station dihang nahinabi sa Banat News usa ka gwardiya sa usa ka kompanya duol sa dapit diin mapalgi ang biktima maoy nakadiskubre sa maong patay’ng lawas sa babaye.

Una niini, naalaan pang lalaki ang maong biktima apan diha ra kini naklaro dihang kini gipahayang, giingong nagdiwalwal na ang dila niini maong dako ang pagtuong gipatay kini pinaagi sa pagtuok dayon gilabay kini sa maong dapit.

Ang patay’ng lawas gidala na sa Mountain View Funeral Parlor sa barangay Inayagan, Naga aron kini masusi sa mga nawagtangan og sakop sa pamilya samtang nagpadayon pa ang imbestigasyon sa kapolisan. (BANAT NEWS)