Sa kasaysayan karon

Organisasyon sa rebolusyon

CEBU, Philippines - 1898—Giestablisar ni Heneral Emilio Aguinaldo ang El Heraldo de la Revolucion isip opisyal nga organisasyon sa Revolutionary Government nga iyang gitukod sa pagsugod sa pag-alsa sa mga Filipino batok sa mga Espanyol dinhi sa Pilipinas.

Pinugsanay nga sterilization

1933— Nasayod ba mo nga dako kaayo ang bilib sa mga Nazi German sa ilang kaugalingon nga sila ra maoy bugtong perpektong binuhat sa kalibutan? Usa ka balaod nga gitawag og German Sterilization Law o Gesetz zur Verhütung erbkranken Nachwuchses (Law for the Prevention of Genetically Diseased Offspring) ang giproklamar sa ilawom sa pamunoan ni Adolf Hitler Hulyo 14,1933. Nagtuo si Hitler nga ang perpektong Aryan (ang tawag nila sa perpektong tawo) kinahanglang blond ang buhok, blue ang mata, dili tambok ug himsog ang panglawas. Bisan kinsang mga German nga gidudahang may kaliwat nga buang, bakol, may manic-depressive insanity, patolon, buta, bungol, palahubog, bayot, tomboy, putot o pandak ug bisan na ang grabeng pagkapalahubog, biga-on (sa babaye) ug higal (sa lalaki) ug uban pa, ang awtomatikong ipailawom sa operasyon aron dili na sila makaanak pa. Gikan sa 1934 hangtud 1937 dul-an sa tunga sa milyong Germans ang pugsanong gipailawom sa tubal ligation (sa mga babaye) ug vasectomies (sa mga lalaki) sa tuyo nga makab-ot ang “racial hygiene.” Gawas sa pinugsanay nga operasyon dunay dul-an 100,000 ka Germans nga may deperensya sa pangisip ang sekretong gipapatay pinaagi sa gas chamber. Kini usab ang sinugdanan nganong gipapatay ni Hitler ang mga Jews o Hudiyo, mga Gypsies sa Uropa tungod kay giingong dili sila perpektong tawo. Apan gihimong kataw-anan ang maong balaod sa mga kritiko ni Hitler tungod kay sagad sa mga suod niyang mga heneral ug opisyales sa gobiyerno dili mga perpekto tungod kay sila himamaye, daghang kabit, dunay bayot, dunay rapist ug mismong si Hitler, itom ang buhok ug dili usab blue ang mga mata.

Dinamita ug ang Nobel Prize

1867—Unang gipaila ni Alfred Nobel ang pagamit og dinamita sa usa ka quarry sa Redhill, Surrey sa Amerika. Niadtong 1866 unang nadiskubrehan ni Nobel ang luwas nga komposisyon sa eksplosibong likido nga nitroglycerin ug gitawag niya kining dinamita. Tungod kay in-demand kini sa mga minahan ug sa mga militar mitukod siya og pabrika. Tuig 1864 gitukod niya ang una niyang pabrika sa iyang yutang natawhan sa Stockholm, Sweden apan usa ka aksidenteng eksplosyon sa maong pabrika ang mikalas sa iyang manghod ug upat ka trabahante. Sukad niadto ang mga dinamitang gihimo sa mga dugang pabrika nga iyang gitukod sa Pransya, Germany ug Amerika gisiguro niyang luwas. Tungod sa iyang mga imbensyon nakita niya ang maayong nahimo niini sa kalamboan sa tawo apan nakita usab niya ang dakong kadaot nga gibunga niini dihang kini gigamit na sa mga giyera. Namatay si Nobel niadtong 1896 ug nagbilin og 9 milyones dolyares nga katigayonan nga sa iyang katapusang testament iyang gimando nga himuong premyo sa si bisan kinsang tawo nga makatampo sa paglambo sa katawhan nga karon mao ang gitawag nga Nobel Prize. (BANAT NEWS)