350 kilong isda gisakmit

CEBU, Philippines - Moabot og 350 ka kilong mga lain-laing klase sa isdang nakuha sa illegal nga pagpanagat ang nasakmit sa kapulisan uban ang usa ka panagatan ug walo ka tripulante nga nipahigayon og illegal nga pagpangisda sa kadagatan sa Tañon Straight sakop sa lungsod sa Tabuelan niadtong Huwebes sa alas 2:30 sa hapon.

Ang nadakpan nga panagatan mao ang F/B Marcris-XI nga gipanag-iya ni Renato Corales, 60, taga Bacolod City, Negros Occidental.

Samtang ang kapitan niini nga apil sa nadakpan mao si Pedro Almollas, 40, taga Bantayan Island ug ang pito niini ka tripulante.

Ang mga tripulante mao sila si Johnny Desocatan, 34; Junald Martinez, 25; Alex Predis, 23; Condrado Mari Juan, 31; pulos molupyo sa Cadiz City, Negros Occidental; Roberto Adrino, 41; Joseph Trocio, 26; ug Romeo Repolon, 43, mga molupyo gihapon sa Negros.

Matud ni PO2 Gilbert Allego sa Tabuelan Police Station dihang nahinabi sa Banat News nadakpan ang maong panagatan sa nagpatrolyang sakop sa Bantay Dagat sa lungsod inabagan sa kapulisan sa maong dapit dihang ilang nabatyagan ang panagatan.

Gikatahong diha kini nanagat sulod sa “municipal sea water” sa lungsod maong ilaha kining gidakop.

Dihang gisaka ang maong panagatan nakuha gikan kanila ang gibanabanang napulo ka banyera nga 350 ka kilong mga lain-laing klase sa isda ug gidala sila sa presinto.

 Apan human nakabayad sa multa tungod sa paglapas sa municipal ordinance gipapauli dayun kagahapong adlawa ang mga mananagat. (BANAT NEWS)